22 شىلدەدەن باستاپ ەۋرازيالىق ەكونوميكالىق وداق (ەاەو) مەن موڭعوليا اراسىنداعى ۋاقىتشا ساۋدا كەلىسىمى كۇشىنە ەندى. قۇجات 367 تاۋار سۋبپوزيسياسى بويىنشا كەدەندىك باجداردى جويۋدى نەمەسە تومەندەتۋدى كوزدەيدى. بۇل پوزيسيالار ءوزارا تاۋار اينالىمىنىڭ شامامەن 90% قۇرايدى. كەلىسىم ەكى جاقتىڭ ەكسپورتتاۋشىلارى مەن يمپورتتاۋشىلارىنا جاڭا مۇمكىندىكتەر اشادى، دەپ حابارلايدى infohub.kz.
ەۋرازيالىق ەكونوميكالىق كوميسسيانىڭ (ەەك) مالىمەتىنشە، كەلىسىم 2025 جىلى قول قويىلىپ، ءۇش جىلعا ەسەپتەلگەن. قۇجات تاعى ءبىر ءۇشجىلدىق مەرزىمگە اۆتوماتتى تۇردە ۇزارتىلۋ مۇمكىندىگىن قاراستىرادى. «كەلىسىم كۇشىنە ەنگەننەن كەيىن ءار تاراپ ءۇشىن 367 تاۋار سۋبپوزيسياسى بويىنشا كەدەندىك باجدار نولگە تۇسىرىلەدى نەمەسە تومەندەتىلەدى»، — دەدى ەەك.
ەۋرازيالىق ەكونوميكالىق كوميسسيانىڭ ساۋدا جونىندەگى ءمينيسترى اندرەي سلەپنەۆتىڭ ايتۋىنشا، ەاەو ەلدەرىنىڭ جەتكىزۋشىلەرى ەرەكشە ارتىقشىلىقتارعا يە، ويتكەنى موڭعوليانىڭ ايماقتاعى باسقا ەلدەرمەن ۇقساس ساۋدا كەلىسىمدەرى جوق. ونىڭ سوزىنە قاراعاندا، وداق مەملەكەتتەرىنىڭ وندىرۋشىلەرى موڭعول نارىعىنا ازىق-ت ۇلىك جانە ونەركاسىپ تاۋارلارىنىڭ كەڭ اسسورتيمەنتىن نەعۇرلىم ءتيىمدى شارتتارمەن جەتكىزە الادى. «ونىمدەر تىزىمىنە ءسۇت ونىمدەرى، سۋسىندار، كونديتەرلىك بۇيىمدار مەن شوكولاد، جەڭىل جانە جۇك اۆتوموبيلدەرى، كوسمەتيكا، پارفيۋمەريا جانە باسقا دا تۇتىنۋ تاۋارلارى كىرەدى. ءوز كەزەگىندە، ەاەو نارىعىنا جەڭىلدىك رەجيمىندە جوعارى ساپالى ەت ونىمدەرى، ايگىلى موڭعول كاشەميرى، سونداي-اق باسقا دا اۋىل شارۋاشىلىعى جانە ونەركاسىپ تاۋارلارى تۇسەدى»، — دەپ اتاپ ءوتتى ەەك.
كەلىسىمنىڭ ىسكە قوسىلۋى قارساڭىندا ەۋرازيالىق ەكونوميكالىق كوميسسيا بيزنەس وكىلدەرىمەن جانە تاراپتاردىڭ سالالىق ۆەدومستۆولارىمەن بىرلەسىپ ءوزارا ساۋدانى ودان ءارى ۇلعايتۋعا باعىتتالعان قوسىمشا شارالاردى كەلىستى. «اتاپ ايتقاندا، اگروونەركاسىپ كەشەنىندەگى ىنتىماقتاستىقتى كەڭەيتۋ، ەت جانە ەت ونىمدەرىن جەتكىزۋدى ارتتىرۋ، تاۋارلاردىڭ ءبىر-بىرىنىڭ نارىعىنا شىعۋىنداعى تەحنيكالىق كەدەرگىلەردى جويۋ جانە ەلەكتروندى ساۋدانى دامىتۋ تۋرالى ۋاعدالاستىقتارعا قول جەتكىزىلدى»، — دەپ ناقتىلادى ەەك.
اندرەي سلەپنەۆتىڭ ايتۋىنشا، كەلىسىمنىڭ كۇشىنە ەنۋىنە قاتىستى كۇتۋلەر ىسكەرلىك بەلسەندىلىككە وڭ اسەر ەتكەن. ونىڭ حابارلاۋىنشا، 2026 جىلدىڭ باسىندا ەاەو مەن موڭعوليا اراسىنداعى ءوزارا ساۋدا 2025 جىلدىڭ سايكەس كەزەڭىمەن سالىستىرعاندا شامامەن ۇشتەن بىرگە وسكەن. مينيستر جاڭا جاعدايلار ەكونوميكالىق ىنتىماقتاستىقتى ساپالى جاڭا دەڭگەيگە كوتەرۋگە مۇمكىندىك بەرەتىنىنە سەنىم ءبىلدىرىپ، بيزنەس وكىلدەرىن موڭعول كومپانيالارىمەن سەرىكتەستىكتى كەڭەيتۋ ءۇشىن اشىلىپ جاتقان مۇمكىندىكتەردى بەلسەندى پايدالانۋعا شاقىردى.