2026 جىلعى 22 شىلدەدەن باستاپ ەۋرازيالىق ەكونوميكالىق وداق پەن موڭعوليا اراسىنداعى ۋاقىتشا ساۋدا كەلىسىمى كۇشىنە ەندى. وسىعان بايلانىستى سىرتقى ەكونوميكالىق قىزمەتكە قاتىسۋشىلار ءۇشىن دەكلاراسيالاۋ مەن جەڭىلدىكتەردى قولدانۋدى جەڭىلدەتەتىن جاڭا كەدەن كودتارى ەنگىزىلدى. بۇل تۋرالى infohub.kz سايتى حابارلايدى.
ەۋرازيالىق ەكونوميكالىق كوميسسيانىڭ حابارلاۋىنشا، موڭعوليادان نەمەسە ەاەو-كە مۇشە مەملەكەتتەردەن شىعارىلعان جانە كەلىسىم اياسىندا وداقتىڭ كەدەندىك اۋماعىنا اكەلىنەتىن تاۋارلاردى كەدەندىك دەكلاراسيالاۋ كەزىندە جاڭا «مە» كودى قاراستىرىلعان.
«سونىمەن قاتار، EAM نىسانىنداعى تاۋاردىڭ شىعۋ تەگى تۋرالى سەرتيفيكاتتىڭ مالىمەتتەرىن كورسەتۋ ءۇشىن ارنايى «06022» كودى ەنگىزىلەدى»، — دەپ ناقتىلادى ەەك.
ەۋرازيالىق ەكونوميكالىق كوميسسيانىڭ القاسى ءتيىستى شەشىمدى 2026 جىلعى 21 شىلدەدە قابىلدادى. الايدا قۇجات رەسمي جاريالانعاننان كەيىن 30 كۇنتىزبەلىك كۇن وتكەن سوڭ كۇشىنە ەنەدى.
«شەشىم كۇشىنە ەنگەنگە دەيىن سىرتقى ەكونوميكالىق قىزمەتكە قاتىسۋشىلار قولدانىستاعى كودتاردى پايدالانۋدى جالعاستىرۋى قاجەت»، — دەپ ەسكەرتتى ەەك.
ەۋرازيالىق ەكونوميكالىق كوميسسيانىڭ مالىمەتىنشە، كەدەن باجدارىن تولەۋ بويىنشا جەڭىلدىكتەردى كورسەتۋ ءۇشىن «تي» كودى قولدانىلادى. بۇل كود 1.1-تارماقشادا اتالماعان وزگە پرەفەرەنسيالارعا ارنالعان. تاۋاردىڭ شىعۋ تەگىن راستايتىن قۇجات رەتىندە ۋاقىتشا «06999» كودىن كورسەتۋ قاجەت. بۇل كود ءونىمنىڭ شىعۋ تەگىنە قاتىستى وزگە قۇجاتتارعا ارنالعان.
ەۋرازيالىق ەكونوميكالىق كوميسسيادا جاڭا كودتاردى ەنگىزۋ سىرتقى ساۋدا وپەراسيالارىنىڭ ەسەبىن جەڭىلدەتۋگە، تاۋارلاردى راسىمدەۋدى اشىق ءارى تۇسىنىكتى ەتۋگە، سونداي-اق سىرتقى ەكونوميكالىق قىزمەتكە قاتىسۋشىلاردىڭ قارجىلىق جانە اكىمشىلىك شىعىندارىن ازايتۋعا كومەكتەسەتىنىن اتاپ وتەدى.
ەسكە سالا كەتەيىك، ەۋرازيالىق ەكونوميكالىق وداقتىڭ، وعان مۇشە مەملەكەتتەردىڭ جانە موڭعوليانىڭ اراسىنداعى ۋاقىتشا ساۋدا كەلىسىمى 2025 جىلعى 27 ماۋسىمدا مينسكىدە قول قويىلعان بولاتىن. قۇجات تاۋارلاردىڭ كەڭ تىزبەسى بويىنشا كەدەن باجدارىن ءوزارا تومەندەتۋدى نەمەسە جويۋدى كوزدەيدى جانە تاراپتار اراسىنداعى ساۋدا-ەكونوميكالىق ىنتىماقتاستىقتى ودان ءارى دامىتۋعا باعىتتالعان.