كونگو دەموكراتيالىق رەسپۋبليكاسىندا ەبولا ۆيرۋسىن جۇقتىرعاندار سانى 7 مىڭنان استى، ال ينفەكسيا ەلدىڭ تاعى ءبىر پروۆينسياسىنا تارادى، دەپ حابارلايدى infohub.kz سايتى.
سوڭعى دەرەكتەرگە قاراعاندا، اۋرۋ جەتى پروۆينسيادا 7 022 ادامدا راستالدى. ىندەتتەن 3 398 ناۋقاس قازا تاپتى.
بۋنديبۋگيو ۆيرۋسىنان تۋىنداعان قازىرگى ىندەت كونگو تاريحىنداعى ەڭ اۋقىمدى ءارى ەڭ ءقاۋىپتى ىندەتكە اينالدى. ول 2018–2020 جىلدارداعى ەپيدەميادان اسىپ ءتۇسىپ، الەمدە كولەمى جاعىنان ەكىنشى ورىنعا شىقتى.
ەڭ اۋقىمدى ىندەت 2014–2016 جىلدارى باتىس افريكادا بولعان. وندا گۆينەيا، ليبەريا جانە سەررا-لەونەدە 28،6 مىڭنان استام ادام جۇقتىرىپ، 11 مىڭنان استام ناۋقاس قازا تاپتى.
ەبولانىڭ جاڭا جاعدايى كونگونىڭ سولتۇستىك-باتىسىنداعى وڭتۇستىك ۋبانگي پروۆينسياسىندا — ينفەكسيا تاراعان وشاقتان الىس جەردە انىقتالدى. بۇل اۋماق كونگو رەسپۋبليكاسىمەن جانە ورتالىق افريكا رەسپۋبليكاسىمەن شەكتەسەدى.
بۋنديبۋگيو ۆيرۋسى سەيسەنبىدە قازا تاپقان 23 جاستاعى ەر ادامنان تابىلدى. ول 10 شىلدەدە ەلدىڭ شىعىسىنداعى وڭتۇستىك كيۆۋ پروۆينسياسىنان شىعىپ، ءبىراز ۋاقىت شەتەلدە بولعان، كەيىن كونگوگا ورالىپ، وڭتۇستىك ۋبانگيگە كەلگەنى انىقتالدى.
«قازىرگى تاڭدا وڭتۇستىك ۋبانگي پروۆينسياسىنداعى العاشقى راستالعان جاعداي بويىنشا بايلانىستا بولعانداردى انىقتاۋ جۇمىستارى جۇرگىزىلۋدە»، — دەلىنگەن كونگو قوعامدىق دەنساۋلىق ساقتاۋ ينستيتۋتىنىڭ ەسەبىندە.
دۇنيەجۇزىلىك دەنساۋلىق ساقتاۋ ۇيىمى بۇعان دەيىن ەبولانىڭ تارالۋىن توقتاتۋعا بىلىكتى مەديكتەردىڭ، جەدەل سەرىكتەستەردىڭ جانە قارجىلاندىرۋدىڭ جەتىسپەۋى كەدەرگى كەلتىرەتىنىن ەسكەرتكەن. ىندەت گەوگرافياسى كەڭەيگەن سايىن ماسەلەلەر ۋشىعا تۇسۋدە.
بۇعان دەيىن «كۋرسيۆ» ەبولا ەپيدەمياسىمەن كۇرەسۋ ءۇشىن 5 مىڭ مەديسينا قىزمەتكەرى جەتىسپەيتىنىن جازعان.