ەفيوپيانىڭ ءتۇرلى ايماقتارىندا بيلىككە قارسى شايقاسىپ جۇرگەن جەتى ب ۇلىكشى توپ ادديس-ابەباداعى ۇكىمەتتى قۇلاتۋ ماقساتىندا بىرىككەنىن جاريالادى، دەپ حابارلايدى infohub.kz سايتى.
جاڭا كواليسيا «ءومىر ءسۇرۋ ءۇشىن وداق» دەپ اتالادى. وعان امحاراداعى «فانو» ميليسياسى، ورومو ازاتتىق ارمياسى، تيگراي حالىق ازاتتىق مايدانى جانە تاعى ءتورت شاعىن توپ كىردى.
بۇل توپتار پرەمەر-مينيستر ابي احمەد ۇكىمەتىن «سوعىس، گەنوسيد، جاپپاي قىرىپ-جويۋ جانە تۇبەگەيلى كەدەيلىك» جۇرگىزدى دەپ ايىپتاپ، ەفيوپيا ىدىراۋ قاۋپىنە ۇشىراعانىن مالىمدەدى. فەدەرالدىق بيلىك ازىرگە جاۋاپ قاتقان جوق.
ەفيوپيا بىرنەشە جىلدان بەرى ەڭ كوپ حالقى بار ورومو مەن امحارا شتاتتارىندا قارۋلى قاقتىعىستارعا تاپ بولىپ وتىر. سولتۇستىكتەگى تيگراي ايماعىندا دا شيەلەنىس قايتا ءورشىدى: ەكى جىلعا سوزىلعان ازاماتتىق سوعىس جۇزدەگەن مىڭ ادامنىڭ ءومىرىن قيىپ، ميلليونداعان ادامدى ءۇي-جايىنان ايىردى.
2022 جىلى افريكا وداعىنىڭ بىتىمگەرشىلىك كەلىسىمى سول سوعىستى توقتاتتى. الايدا ەكى تاراپ تا كەلىسىمدى بۇزدى دەپ ءبىر-بىرىن ايىپتاعاندىقتان، تولىققاندى قاقتىعىستىڭ قايتا باستالۋ ءقاۋپى بار.
جاڭا وداق ورومو، امحارا جانە تيگرايمەن قاتار وگادەن، افار جانە بەنيشانگۋل-گۋمۋز ايماقتارىنداعى توپتاردى دا بىرىكتىردى. وسىلايشا ول ەفيوپيانىڭ 12 ايماقتىق شتاتىنىڭ جارتىسىن قامتيدى.
امحاراداعى «فانو» توبى تيگراي سوعىسى كەزىندە فەدەرالدىق كۇشتەرمەن بىرگە شايقاستى. ءبىراق سوعىس اياقتالعان سوڭ ءبىر جىل وتپەي-اق قارۋسىزدانۋ تۋرالى ۇكىمەت بۇيرىعىن ورىنداۋدان باس تارتىپ، فەدەرالدىق بيلىككە قارسى قارۋلى كوتەرىلىسكە شىقتى.
ۇكىمەت ورومو ازاتتىق ارمياسىمەن 2018 جىلدان بەرى كۇرەسىپ كەلەدى.
«ءومىر ءسۇرۋ ءۇشىن وداق» كواليسياسىنىڭ جاريالانۋى تيگراي حالىق ازاتتىق مايدانى مەن كورشى ەريترەيا اراسىندا وداق قۇرىلدى دەگەن حابارلاردان بىرنەشە اي وتكەن سوڭ بولدى.
ابي بۇعان جاۋاپ رەتىندە ەفيوپيانىڭ «قورعانىس قابىلەتىنە» سەنەتىنىن ايتتى.
«باسقالار قوسىلسا دا، ەفيوپيانىڭ ەگەمەندىگىنە قاتىستى بىزدە قىلاۋداي قورقىنىش جوق»، — دەدى ول شىلدەدە زاڭ شىعارۋشىلارعا.
ەلدە ماۋسىمدا جالپى سايلاۋ ءوتتى. داۋىس بەرۋ قاقتىعىستار مەن قىسىم جاساۋ ايىپتارىنىڭ كولەڭكەسىندە ءوتىپ، وپپوزيسيالىق پارتيالار از قاتىسقانىنا قاراماستان، ءابيدىڭ «وركەندەۋ» پارتياسى پارلامەنتتەگى باسىم كوپشىلىگىن ساقتاپ قالدى.
«فانو» مەن ورومو ازاتتىق ارمياسى سايلاۋدى دا، ونىڭ ناتيجەلەرىن دە مويىندامادى. التى ميلليون تۇرعىنى بار تيگراي ايماعى سايلاۋعا مۇلدەم جىبەرىلمەدى.