قازاقستاندىقتار ەندى eGov Mobile ءموبيلدى قوسىمشاسىنىڭ ءبىر بولىمىنەن پوليسياعا وقيعا تۋرالى حابارلاي الادى، جەكە دەرەكتەردىڭ ىقتيمال تارالۋىن تەكسەرە الادى، كرەديتتەر مەن ميكروكرەديتتەردەن باس تارتا الادى، سونداي-اق ءبىرقاتار انىقتاما الىپ، اكىمشىلىك ايىپپۇلداردى تەكسەرە الادى. بۇل تۋرالى infohub.kz سايتى حابارلايدى.

جاڭارتىلعان سەرۆيس eGov Mobile قوسىمشاسىندا پايدا بولدى. ەندى ول قاۋىپسىزدىك، قۇقىق بۇزۋشىلىقتىڭ الدىن الۋ جانە قۇقىق قورعاۋ قىزمەتىنە قاتىستى سەرۆيستەر جيناقتالعان ءبىرىڭعاي سيفرلىق ۆيترينا رەتىندە جۇمىس ىستەيدى.

«زاڭ جانە ءتارتىپ» بولىمىندە قازاقستاندىقتارعا بىرنەشە پراكتيكالىق سيفرلىق سەرۆيس قولجەتىمدى.

پوليسياعا حابارلاۋ. «102» سەرۆيسى ارقىلى وقيعا، تۇرمىستىق زورلىق-زومبىلىق، جول-كولىك وقيعاسى، جول قوزعالىسى ەرەجەلەرىنىڭ بۇزىلۋى جانە پوليسيانىڭ ارالاسۋىن قاجەت ەتەتىن باسقا دا جاعدايلار تۋرالى ءوتىنىش جىبەرۋگە بولادى.

جەكە دەرەكتەردىڭ تارالعانىن تەكسەرۋ. ول ءۇشىن Nomad Guard سەرۆيسى ارنالعان. ول جەكە دەرەكتەردىڭ ىقتيمال تارالۋ فاكتىلەرىن تەكسەرۋگە مۇمكىندىك بەرەدى.

تاۋار تاڭبالاۋىن تەكسەرۋ. Naqty Onim سەرۆيسى تاۋارلاردىڭ تاڭبالاۋى تۋرالى اقپارات الۋعا مۇمكىندىك بەرەدى.

جاڭا كرەديتتەردى راسىمدەۋدەن قورعانۋ. بولىمدە كرەديتتەر مەن ميكروكرەديتتەردەن باس تارتۋ سەرۆيسى دە قولجەتىمدى.

سونىمەن قاتار قازاقستاندىقتار قۇقىق قورعاۋ سالاسىنداعى ەڭ سۇرانىسقا يە مەملەكەتتىك قىزمەتتەردى الا الادى. اتاپ ايتقاندا، ءبولىم ارقىلى سوتتىلىعىنىڭ بار-جوعى تۋرالى انىقتاما الۋعا، شەتەلگە شىعۋعا تىيىم سالىنعانىن تەكسەرۋگە، ادامنىڭ سىبايلاس جەمقورلىق قىلمىسىن جاساعانى تۋرالى مالىمەت الۋعا، سونداي-اق اكىمشىلىك ايىپپۇلداردى تاۋىپ، تولەۋگە بولادى.

جەكە بلوك قازاقستان باس پروكۋراتۋراسىنىڭ سيفرلىق سەرۆيستەرى مەن اقپاراتتىق ماتەريالدارىنا ارنالعان. وندا، اتاپ ايتقاندا، حابار-وشارسىز كەتكەن ادامداردى ىزدەۋ سەرۆيسى، قۇقىق بۇزۋشىلىق تۋرالى ءوتىنىشتىڭ تىركەلۋىن تەكسەرۋ قۇرالى جانە قۇقىقتىق ستاتيستيكا ماتەريالدارى قولجەتىمدى.

«ۇلتتىق اقپاراتتىق تەحنولوگيالار» اق دەرەكتەرىنە سايكەس، سەرۆيس 2025 جىلدىڭ ماۋسىمىندا ىسكە قوسىلعاننان بەرى ونى شامامەن 1،4 ملن رەت پايدالانعان.

«ۇات» اق كومانداسى سيفرلىق سەرۆيستەر مەن مەملەكەتتىك قىزمەتتەردى جەتىلدىرۋ بويىنشا تۇراقتى جۇمىس ىستەپ، ولاردى ازاماتتاردىڭ قاجەتتىلىكتەرىنە ساي ىڭعايلى ءارى قولجەتىمدى ەتىپ كەلەدى»، — دەدى «ۇلتتىق اقپاراتتىق تەحنولوگيالار» اق باسقارما ءتوراعاسى داۋلەت بەكمانوۆ.

بۇعان دەيىن eGov-تا شۇعىل اۋرۋحاناعا جاتقىزۋ تۋرالى حابارلاما سەرۆيسى ىسكە قوسىلعان بولاتىن.