19 شىلدە ءتۇنى قازاقستاندا eGov.kz پورتالىنا، eGov Mobile ءموبيلدى قوسىمشاسىنا جانە باسقا دا مەملەكەتتىك ەلەكتروندىق قىزمەتتەرگە قولجەتىمدىلىك ۋاقىتشا شەكتەلەدى، دەپ حابارلايدى infohub.kz سايتى.
جوسپارلى تەحنيكالىق جۇمىستار 19 شىلدەدە ساعات 02:00-دەن 08:00-گە دەيىن جۇرگىزىلەدى. «ۇلتتىق اقپاراتتىق تەحنولوگيالار» (ۇات) كومپانياسى ۋاقىتتى پايدالانۋشىلاردىڭ ەڭ از بەلسەندىلىگىنە قاراي تاڭداعانىن، وسىلايشا ىقتيمال قولايسىزدىقتاردى ازايتۋعا تىرىسقانىن ءتۇسىندىردى.
جۇمىستار كەزىندە كەلەسى قىزمەتتەر قولجەتىمسىز بولادى: eGov.kz پورتالى مەن eGov Mobile ءموبيلدى قوسىمشاسى، ونىڭ ىشىندە «سيفرلىق قۇجاتتار» سەرۆيسى؛ e-Otinish، E-license پورتالدارى جانە اشىق ۇكىمەت جۇيەلەرى؛ قازاقستان رەسپۋبليكاسىنىڭ ۇلتتىق كۋالاندىرۋشى ورتالىعىنىڭ (ق ر ۇكو) سەرۆيستەرى؛ «ۇات» اق قىزمەت كورسەتەتىن باسقا دا جوبالار؛ ەكىنشى دەڭگەيلى بانكتەردىڭ ءموبيلدى قوسىمشالارى جانە ەلەكتروندىق ۇكىمەت شليۋزىنە قوسىلعان باسقا جۇيەلەر ارقىلى قولجەتىمدى مەملەكەتتىك قىزمەتتەر.
ۇات پايدالانۋشىلارعا بارلىق قاجەتتى وپەراسيالاردى الدىن الا اياقتاپ، سونداي-اق تەحنيكالىق جۇمىستار كەزىندە قاجەت بولۋى مۇمكىن قۇجاتتاردىڭ ءتۇپنۇسقالارىن دايىنداۋدى ۇسىنادى.
كومپانيادا جاڭارتۋ مەملەكەتتىك قىزمەتتەردىڭ سيفرلىق ەكوجۇيەسىنىڭ تۇراقتى جانە ۇزدىكسىز جۇمىسىن قامتاماسىز ەتۋ ماقساتىندا جۇرگىزىلەتىنى اتاپ ءوتىلدى.
بۇعان دەيىن CAPS Unlock تالداۋ ورتالىعىنىڭ تاۋەلسىز زەرتتەۋشىسى جاننات بوبەكباەۆا eGov Mobile قوسىمشاسىنىڭ جاساندى ينتەللەكت كومەكشىسىن ەكى تىلدە سىناپ، پايدالانۋشىلاردىڭ سۇراۋ تىلىنە بايلانىستى ايىپپۇلدار تۋرالى ءارتۇرلى اقپارات الاتىنىن انىقتادى.