شىعىس قازاقستان وبلىسىنداعى كۋرشۋم وزەنى ماڭىندا جۇرگىزىلىپ جاتقان اۋقىمدى جۇمىستاردىڭ ۆيدەوسى الەۋمەتتىك جەلى قولدانۋشىلارىنىڭ الاڭداۋشىلىعىن تۋدىردى. جاريالانىم اۆتورى التىن وندىرۋشىلەر وزەن ارناسىنا ءقاۋىپ ءتوندىرۋى مۇمكىن ەكەنىن ايتادى. ەندى جاعدايدى ەكولوگتار تەكسەرەدى... دەپ حابارلايدى infohub.kz سايتى.
كادرلاردا اۋىر تەحنيكانىڭ وزەن ارناسىن بوگەپ جاتقانى، ورمان كەسىلىپ، جول سالىنىپ جاتقانى كورىنەدى. «وزەندى بوگەپ تاستادى، ءارى قاراي قالاي بارامىز بەلگىسىز. ارعى جاعىندا ورمان كەسىپ، جول سالىپ جاتىر. ءقازىر وسى ۋچاسكەدەن قالاي وتەتىنىمىزدى كورەمىز. بارلىق بەلگى بويىنشا وتە قيىن بولادى. ال سىزدەر قانداي اۋقىمدى ەكەنىن قاراڭىزدار: التىن ءۇشىن ءبارىن قوپارىپ جاتىر»، — دەيدى ۆيدەو اۆتورى.
جاريالانىمدا كۋرشۋم عانا ەمەس، قالجىر وزەنى دە ءقاۋىپ استىندا تۇرعانى ايتىلادى. كادر سىرتىنداعى داۋىس جۇمىستارعا شەتەل ازاماتتارىنىڭ قاتىسىپ جاتقانىن مالىمدەيدى.
كۋرشۋم اۋدانى اۋماعىنداعى جۇمىستاردى «گرك «ۆيزول» ج ش س جۇرگىزىپ جاتىر. كومپانيا قىستاۋ-كۋرشۋم وزەنىنىڭ الابىنداعى توكبۋرا ۋچاسكەسىندە گەولوگيالىق بارلاۋ جانە باعالى مەتالداردى وندىرۋمەن اينالىسادى. شقو اكىمىنىڭ ءباسپاسوز قىزمەتىنىڭ مالىمەتىنشە، جەر قويناۋىن پايدالانۋشىدا قاجەتتى رۇقسات قۇجاتتارى بار. اتاپ ايتقاندا، كومپانيا I ساناتتاعى وبەكتىلەر ءۇشىن قورشاعان ورتاعا ەميسسيالارعا رۇقساتتى 2021 جىلعى 26 ناۋرىزدا العان. الايدا الەۋمەتتىك جەلىلەردە پايدا بولعان بەينەماتەريالدار جەكە تەكسەرۋدى قاجەت ەتەدى.
شقو بويىنشا ەكولوگيا دەپارتامەنتى كومپانيا قىزمەتىنە جوسپاردان تىس تەكسەرۋ جۇرگىزۋدى باستادى. ماماندار ەكولوگيالىق تالاپتاردىڭ ساقتالۋىن جانە جۇرگىزىلىپ جاتقان جۇمىستاردىڭ سۋ وبەكتىسىنە اسەرىن انىقتايدى. «قازىرگى ۋاقىتتا شىعىس قازاقستان وبلىسى بويىنشا ەكولوگيا دەپارتامەنتى جەر قويناۋىن پايدالانۋشىنىڭ قىزمەتىن ەكولوگيالىق زاڭناما تالاپتارىنىڭ ساقتالۋىنا، جۇرگىزىلىپ جاتقان جۇمىستاردىڭ سۋ وبەكتىسىنە ىقتيمال اسەرى تۋرالى اقپاراتتى ەسكەرە وتىرىپ، جوسپاردان تىس تەكسەرۋدى باستادى»، — دەدى شقو اكىمىنىڭ ءباسپاسوز حاتشىسى لاۋرا جاقىپوۆا.
تەكسەرۋ قورىتىندىسى بويىنشا كومپانيانىڭ ارەكەتتەرىنە قۇقىقتىق باعا بەرىلەدى. ەگەر بۇزۋشىلىقتار راستالسا، جەر قويناۋىن پايدالانۋشىعا زاڭدا كوزدەلگەن شارالار قولدانىلادى. اكىمدىكتە جاعداي ۋاكىلەتتى مەملەكەتتىك ورگانداردىڭ باقىلاۋىندا ەكەنىن دە مالىمدەدى. تەكسەرۋ ناتيجەلەرى مەن قابىلدانعان شارالار تۋرالى بيلىك قوسىمشا حابارلاۋعا ۋادە بەردى.
ايتا كەتەيىك، بۇل كۋرشۋم اۋدانىنداعى التىن ءوندىرىسى داۋ تۋدىرعان العاشقى جاعداي ەمەس. مىسالى، 2021 جىلدىڭ قىركۇيەگىندە الەۋمەتتىك جەلىلەردە كۋرشۋم جانە قىستاۋ-كۋرشۋم وزەندەرىنىڭ ىقتيمال لاستانۋى تۋرالى حابارلامالار تاراعاننان كەيىن شقو ەكولوگيا دەپارتامەنتى كومپانياعا جوسپاردان تىس تەكسەرۋ جۇرگىزگەن بولاتىن. سوندا ماماندار جيناقتاۋشى توعانداردان تەحنولوگيالىق سۋلاردىڭ جەر بەدەرىنە اسىپ توگىلۋى جانە تۇندىرعىشتان سۋدىڭ قىستاۋ-كۋرشۋم وزەنىنە اعىزىلۋى فاكتىلەرىن انىقتاعان.