قازاقستاندىق ەكونوميست الماس شۋكيننىڭ پىكىرىنشە، كولىك ساتىپ الۋ ينۆەستيسيالىق تۇرعىدان ءتيىمسىز. ونىڭ ايتۋىنشا، سيرەك قاتىنايتىندار ءۇشىن تاكسي مەن جالدامالى كولىك ءوز كولىگىنەن ارزانعا ءتۇسۋى مۇمكىن، دەپ حابارلايدى infohub.kz سايتى.
شۋكيننىڭ پايىمداۋىنشا، باستى قارجىلىق شىعىننىڭ ءبىرى — كولىك قۇنىنىڭ تومەندەۋى. مىسال رەتىندە ول شامامەن 20 مىڭ دوللار تۇراتىن جاڭا كولىكتى كەلتىردى. ەكونوميستىڭ ەسەبىنشە، ساتىپ العان بويدا اۆتوموبيل قۇنىنىڭ شامامەن 10 پايىزىن جوعالتۋى مۇمكىن. بۇل جاعدايدا يەسى سالوننان شىققان بەتتە 2 مىڭ دوللاردان ايىرىلادى.
تاعى ءبىر جىلدان كەيىن، شۋكيننىڭ باعامى بويىنشا، كولىك قوسىمشا 10–15 پايىزعا ارزانداۋى ىقتيمال. سونىمەن قاتار يەسى وتىن، تەحنيكالىق قىزمەت، تۇراق جانە باسقا دا شىعىندارعا اقشا جۇمساۋدى جالعاستىرادى.
ەكونوميست كولىكتى سيرەك پايدالاناتىندارعا كۇندەلىكتى ءجۇرىس ءۇشىن تاكسيدى قاراستىرۋدى، ال الىس ساپارلارعا نەمەسە قالا سىرتىنداعى دەمالىسقا كولىكتى جالداۋدى ۇسىنادى.
الايدا قاي نۇسقا ارزان ەكەنىنە قاتىستى امبەباپ جاۋاپ جوق. تۇپكىلىكتى شىعىندار جەڭىل كولىكتىڭ قۇنىنا، جىلدىق جۇرىسىنە، وتىن شىعىنىنا، قىزمەت كورسەتۋ باعاسىنا، تۇراققا جانە تاكسي تاريفتەرىنە بايلانىستى.
سوندىقتان كولىك ساتىپ الار الدىندا ونىڭ باعاسىن عانا ەمەس، بىرنەشە جىلعا جالپى يەلەنۋ قۇنىن دا ەسەپتەگەن ءجون. كوپ جۇرەتىن جۇرگىزۋشى ءۇشىن ءوز كولىگىنىڭ ەكونوميكالىق ارتىقشىلىقتارى اپتاسىنا بىرنەشە رەت قانا قاتىنايتىن ادامعا قاراعاندا وزگەشە بولۋى مۇمكىن.
بۇعان دەيىن كۋرسيۆ اۆتو قازاقستاندا كولىك ۇستاۋعا قانشا اقشا كەتەتىنىن جازعان بولاتىن.