بۇرىنعى حانزادا ەندريۋ ماۋنتبەتتەن-ۆيندزور اتىشۋلى قارجىگەر دجەففري ەپشتەينمەن بايلانىسىنا قاتىستى تەرگەۋ اياسىندا بريتان پوليسياسىنىڭ ارەكەتتەرىنە داۋ ايتىپ وتىر. ونىڭ زاڭگەرلەرى تەمزا القابىنىڭ پوليسياسىنا شاعىم ءتۇسىرىپ، ۇيلەرىندە جۇرگىزىلگەن تىنتۋلەردىڭ زاڭدىلىعىن تەكسەرۋدى تالاپ ەتتى، دەپ حابارلايدى infohub.kz سايتى.
ەسكە سالايىق، ەندريۋ 19 اقپاندا، 66 جاسقا تولعان كۇنى مەملەكەتتىك قىزمەتتەگى زاڭسىز ارەكەتتەرگە كۇدىكپەن ۇستالعان. ول شامامەن 12 ساعات بويى جاۋاپ الىپ، كەيىن بوساتىلدى، الايدا تەرگەۋ جالعاستى.
بىرنەشە كۇننەن كەيىن پوليسيا ساندرينگەم پومەستەسىندە جانە ەندريۋدىڭ ۆيندزورداعى بۇرىنعى Royal Lodge رەزيدەنسياسىندا ءتىنتۋ جۇرگىزدى. ەندى ونىڭ ادۆوكاتتارى ءتىنتۋ جۇرگىزىلگەن وردەرلەردىڭ زاڭدى بولعانىن سوت ارقىلى تەكسەرۋگە تىرىسىپ وتىر.
ازىرگە ەندريۋدىڭ پوليسياعا قويعان ناقتى تالاپتارى جاريا ەتىلگەن جوق. سوت قۇقىق قورعاۋ ورگاندارىنىڭ ءتىنتۋ جۇرگىزۋگە زاڭدى نەگىزى بولعانىن انىقتاۋى ءتيىس.
The Telegraph دەرەگىنشە، ەندريۋدىڭ شاعىمى 1649 جىلى كورول I كارلعا قاتىستى سوتتان بەرگى بريتان كورول وتباسى مۇشەسىنىڭ وزىنە قارسى قىلمىستىق قۋدالاۋدىڭ زاڭدىلىعىنا داۋ ايتقان العاشقى وقيعاسى بولدى.
بۇعان دەيىن Kursiv LifeStyle قازىرگى كورول III ءچارلزدىڭ اعاسى حانزادا ەندريۋ توڭىرەگىندەگى جانجالدىڭ جاڭا تولقىنى 2025 جىلدىڭ سوڭىندا بريتان بيوگرافى ەندريۋ ءلوۋنيدىڭ «يورك ءۇيىنىڭ ورلەۋى مەن قۇلدىراۋى» كىتابى شىققاننان كەيىن تۇتانعانىن جازعان. ول ابىرويى تۇسكەن حانزادانىڭ كوپ جىل بويى دوستارى مەن قىزمەتكەرلەرىنەن وزىنە جاقىندىق كەزدەسۋلەر ءۇشىن ايەلدەر ىزدەستىرۋدى سۇراعانىن مالىمدەدى. اۆتوردىڭ ايتۋىنشا، ەندريۋ اسىرەسە بالەرينا مەن اققۇبا ايەلدەردى قاتتى ۇناتقان.