يوركتىڭ بۇرىنعى گەرسوگى ەندريۋ ماۋنتباتتەن-ۆيندزور دجەففري ەپشتەيننىڭ قۇجاتتارىنا قاتىستى ءىس بويىنشا تۇتقىندالۋىنا بايلانىستى تەمزا القابىنىڭ پوليسياسىنا (Thames Valley Police) قارسى سوت ءىسىن باستادى، دەپ حابارلايدى infohub.kz سايتى.
The Telegraph باسىلىمىنا بەلگىلى بولعانداي، ەكس-پرينستىڭ سەگىز اي بۇرىنعى ۇستالۋى قوعامدا ۇلكەن رەزونانس تۋدىرعان. ەندى ول پوليسيانىڭ وزىنە قاتىستى ارەكەتتەرى زاڭدى بولدى ما، سونى انىقتاۋدى سۇراپ سوتقا جۇگىندى.
ول ساندرينگەم پومەستەسىندەگى ءۇيى مەن ۆيندزورداعى بۇرىنعى رويال-لودج رەزيدەنسياسىندا پوليسيانىڭ ءتىنتۋ جۇرگىزۋىنە مۇمكىندىك بەرگەن وردەرلەرگە قاتىستى سوتتىق قايتا قاراۋ تۋرالى تالاپ قويۋ ارىزىن بەردى.
بۇل — 1649 جىلى كارل I سوتىنان بەرگى كورول وتباسى مۇشەسىنىڭ وزىنە قاتىستى قىلمىستىق قۋدالاۋدىڭ زاڭدىلىعىنا داۋ ايتقان العاشقى جاعدايى. ونىڭ ادۆوكاتتارى تەمزا القابىنىڭ پوليسياسىنىڭ سۇراۋى بويىنشا ورتالىق قىلمىستىق سوتتىڭ (ولد-بەيلي) سۋدياسى بەرگەن ءتىنتۋ وردەرلەرىنىڭ زاڭدىلىعىن تەكسەرۋدى كوزدەپ وتىر.
باسىلىمعا بەلگىلى بولعانداي، وسى اپتادا جوعارعى سوتتا وسى تالاسقا قاتىستى كەيبىر سوت قۇجاتتارىن جاريا ەتۋ ماسەلەسى قارالاتىن جابىق تىڭداۋ وتەدى.
ەسكە سالايىق، اقپان ايىندا ءبىز ەكس-پرينس ەندريۋدى رەسمي لاۋازىمداردى اتقارعان كەزەڭدە ءوز مارتەبەسىن اسىرا پايدالاندى دەپ كۇدىكتەنەتىنىن جازعانبىز. بۇعان دەيىن ەندريۋ كامەلەتكە تولماعانداردى جىنىستىق ساۋداعا ساتۋعا ايىپتالعان جانە 2019 جىلى تۇرمە كامەراسىندا اسىلىپ ءولى تابىلعان ەپشتەينمەن تىعىز بايلانىسى تۋرالى بەلگىلى بولعان سوڭ، حانزادا اتاعىنان ايىرىلعان ەدى.
ماۋنتباتتەن-ۆيندزوردىڭ ءوزى ەپشتەين ىسىنە قاتىستى كەز كەلگەن قۇقىق بۇزۋشىلىقتى ءاردايىم جوققا شىعارىپ، ونىمەن دوستىعىنا وكىنەتىنىن مالىمدەگەن. ايتپاقشى، كارل III قارساڭىندا بۇل جاعدايعا پىكىر بىلدىرگەن.
سونداي-اق ۇلىبريتانيا كورولى كارل IIIء-نىڭ ءىنىسى ەندريۋ ماۋنتبەتتەن-ۆيندزوردىڭ شامامەن 12 ساعاتقا سوزىلعان جاۋاپ الۋدان كەيىن بوساتىلعانى بەلگىلى بولدى. كەيىن باق-تا ەكس-پرينس ەندريۋ مەن بالانىڭ قورقىنىشتى سۋرەتتەرى پايدا بولدى.