قازاقستانعا World Business Consulting قارجى پيراميداسىن ۇيىمداستىرۋشى ەكستراديسيالاندى، دەپ حابارلايدى infohub.kz.
ەلوردالىق قارجى مونيتورينگى اگەنتتىگى (قما) دەپارتامەنتى قارجى پيراميداسىنىڭ قۇرىلىمدىق بولىمشەسىن قۇرىپ، باسقارعان ءىس بويىنشا تەرگەۋدى اياقتادى. تەرگەۋ دەرەگىنشە، 2020 جىلى كۇدىكتى ازاماتتاردىڭ اقشاسىن جوعارى كىرىس ۋادە ەتىپ، ينۆەستيسيالىق باعدارلامالارعا قاتىسۋ دەگەن سىلتاۋمەن تارتقان. كومپانيانىڭ ليسەنزياسى بولماعان جانە ءىس جۇزىندە ينۆەستيسيالىق وپەراسيالار جۇرگىزبەگەن.
«قاراجاتتاردى تارتۋ قولما-قول تۇردە، بۋحگالتەرلىك قۇجاتتارسىز جۇزەگە اسىرىلعان. زاڭدىلىق كورىنىسىن جاساۋ ءۇشىن سالىمشىلارعا ونلاين-پلاتفورمادا جەكە كابينەتتەر اشىلىپ، وندا «كىرىستىلىك» جالعان كورسەتىلگەن»، — دەپ مالىمدەدى قما. تۇسكەن قاراجات پيراميدانىڭ كلاسسيكالىق سحەماسى بويىنشا بولىنگەن: بۇرىن تارتىلعان قاتىسۋشىلارعا تولەمدەر جاڭا سالىمشىلاردىڭ ەسەبىنەن جۇرگىزىلگەن. كليەنتتىك بازانى كەڭەيتۋ ءۇشىن پرەزەنتاسيالار، ۇگىت-ناسيحات شارالارى جانە ءباا مەن تۇركياعا ساپارلار پايدالانىلعان.
سحەمانى ىسكە اسىرۋدىڭ باستاپقى كەزەڭىندە توقتاتتى. 2024 جىلى كۇدىكتى حالىقارالىق ىزدەۋ جاريالاندى، سوت وعان سىرتتاي قاماۋعا الۋ سانكسياسىن بەردى. 2026 جىلدىڭ قاڭتارىندا ايەل گرۋزيادا ۇستالىپ، قازاقستانعا ەكستراديسيالاندى. سوت سانكسياسىمەن ونىڭ جەر تەلىمىنە تىيىم سالىندى. قىلمىستىق ءىس سوتقا جىبەرىلدى.
جىل باسىنان بەرى قما 15 قارجى پيراميداسىن جويدى. زارداپ شەككەندەرگە شىعىندى وتەۋ ءۇشىن ۇيىمداستىرۋشىلاردىڭ مۇلكىنە جالپى سوماسى 662 ميلليون تەڭگەگە تىيىم سالىندى. الدىن الۋ شاراسى رەتىندە الەۋمەتتىك جەلىلەردە 25 مىڭنان استام قاتىسۋشىسى بار 22 چات بۇعاتتالدى، ال «كيبەرقاداعالاۋ» جۇيەسىندە قۇقىققا قايشى مازمۇن بەلگىلەرى بار 1،1 مىڭ سايت پەن اككاۋنت بۇعاتتالدى. قما ازاماتتاردى ساق بولۋعا جانە كۇماندى قارجى ۇيىمدارىنا قاراجات سالماۋعا شاقىردى.