ساۋد ارابياسىنان قازاقستانعا تەرروريزم ناسيحاتتادى دەپ ايىپتالعان 51 جاستاعى اقتوبە وبلىسىنىڭ تۇرعىنى ەكستراديسيالاندى. اقتوبە قالالىق سوتىندا تەرگەۋ نۇسقاسى بويىنشا ساۋد ارابياسىندا تۇرعان كەزىندە Telegram مەسسەندجەرى ارقىلى تەرروريزم ناسيحاتىنىڭ بەلگىلەرى بار ماتەريالدار تاراتقان ەر ادامعا قاتىستى قىلمىستىق ءىس قارالدى، دەپ حابارلايدى infohub.kz سايتى.
ەر ادامنىڭ 2008 جىلى الماتى ارقىلى ساۋد ارابياسىنا كەتىپ، مەدينادا تۇرعانى انىقتالدى. پروكۋروردىڭ ايتۋىنشا، ءىس بويىنشا جىبەرىلگەن حابارلامالاردا تەرروريزم ناسيحاتىنىڭ بەلگىلەرى بار ەكەنىن راستاعان بىرنەشە ساراپتاما جۇرگىزىلگەن.
سوتتا ايىپتالۋشى: «مەن جۇبايىم جانە ءۇش بالاممەن بىرگە ساۋد ارابياسىنا اتتاندىم. يسلامدى قابىلداپ، ءبىلىمىمدى تەرەڭدەتكىم كەلدى. 2008 جىلدان 2026 جىلعا دەيىن سول جەردە تۇردىم. حابارلاما جىبەرگەندەردىڭ ءبىرى 2018 جىلى مەديناعا كەلىپ، وقۋعا ءتۇستى. سولاي تانىستىق. ەكىنشى اداممەن اقتوبەدەگى مەشىتتە تانىستىم. ءۇشىنشى ادامدى ەسىمدە جوق. ەندى قاتەلىگىمدى ءتۇسىندىم، شىن جۇرەكتەن وكىنەمىن. بۇل ءماتىننىڭ تەرروريزمدى ناسيحاتتايتىنىن بىلمەدىم»، — دەدى.
سونىمەن قاتار، وتىرىس بارىسىندا ايىپتالۋشىنىڭ ۇيالى تەلەفونىنان تابىلعان، قارۋلى قاقتىعىستار كورىنىستەرى تۇسىرىلگەن بەينەجازبالار كورسەتىلدى. ءىس ماتەريالدارىنا سايكەس، ەر ادام 2019 جىلى ىزدەۋ جاريالانعان، كەيىن ينتەرپول جەلىسى بويىنشا حالىقارالىق ىزدەۋگە قويىلعان. تەرگەۋ بىرنەشە رەت ۇزارتىلىپ، ءىس بويىنشا ءوندىرىس مەزگىل-مەزگىل توقتاتىلىپ تۇرعان.
اعىمداعى جىلى ايىپتالۋشى ۇستالىپ، قازاقستانعا ەكستراديسيالاندى. ايىپتالۋشىنىڭ قورعاۋشىسى پروسەسسۋالدىق كەلىسىم جاساسۋ تۋرالى ءوتىنىش ءبىلدىردى.