قازاقستاننىڭ ماگيسترالدىق ەنەرگوجۇيەسى ءىرى اقاۋدان كەيىن تولىق قالىپتى جۇمىس رەجيمىنە ورالدى. قازىرگى ۋاقىتتا ەنەرگەتيكتەر وڭىرلەردەگى سوڭعى تۇتىنۋشىلاردى قوسۋ جۇمىستارىن اياقتاپ جاتىر. قالپىنا كەلتىرۋ جۇمىستارىنىڭ اعىمداعى جاعدايى مەن جالعان اقپاراتتىڭ تەرىسكە شىعارىلۋى تۋرالى ق ر ەنەرگەتيكا مينيسترلىگىندە مالىمدەدى، دەپ حابارلايدى infohub.kz سايتى.
ۆەدومستۆونىڭ دەرەكتەرىنە سايكەس، اۆاريا سالدارىن جويۋدىڭ نەگىزگى كەزەڭى ۇلتتىق وپەراتور تاراپىنان ءساتتى اياقتالدى.
«قازىرگى ۋاقىتتا «KEGOC» اق جەلىسى بويىنشا ەلەكترمەن جابدىقتاۋ تولىق كولەمدە قالپىنا كەلتىرىلدى. ءقازىر وڭىرلىك ەنەرگيامەن جابدىقتاۋشى ۇيىمدار جەكەلەگەن تۇتىنۋشىلاردى كەزەڭ-كەزەڭىمەن قوسىپ جاتىر. جاقىن ارادا ەلەكترمەن جابدىقتاۋ تولىق قالپىنا كەلتىرىلەدى»، — دەپ ءتۇسىندىردى ەنەرگەتيكا مينيسترلىگىندە.
جەرگىلىكتى تاراتۋشى كومپانيالارعا قالالىق جانە اۋىلدىق دەڭگەيدە ءقاۋىپسىز كەرنەۋ بەرۋ ءۇشىن ءبىراز ۋاقىت قاجەت، بۇل تاراتۋ جەلىلەرىندەگى قايتالاما كەرنەۋ سەكىرۋلەرىن بولدىرماۋعا مۇمكىندىك بەرەدى.
سالالىق ۆەدومستۆودا سونداي-اق الەۋمەتتىك جەلىلەر مەن مەسسەندجەرلەردە ايماقتاعى كورشىلەردەگى اقاۋ سەبەپتەرى تۋرالى تاراي باستاعان حابارلامالارعا قاتاڭ تۇردە تۇسىنىكتەمە بەردى.
«جەكەلەگەن پابليكتەردە تاراتىلىپ جاتقان وزبەكستانداعى ەلەكترمەن جابدىقتاۋ ۇزىلىستەرى قازاقستاننىڭ ەنەرگوجۇيەسىندەگى اۆاريا سالدارىنان بولدى دەگەن اقپارات شىندىققا سايكەس كەلمەيدى»، — دەپ اتاپ ءوتتى مينيسترلىكتە.
ەنەرگەتيكا مينيسترلىگىندە وڭتۇستىك وڭىرلەردىڭ ەلەكترمەن جابدىقتالۋىنا قاتىستى بارلىق جاعداي ۆەدومستۆو باسشىلىعىنىڭ قاتاڭ جەكە باقىلاۋىندا ەكەنىن قوستى.