قازاقستاندا 25 تامىزدان باستاپ ەلەكتروساموكات يەلەرى مەن جالعا الۋشىلار ءۇشىن قاتاڭ ەرەجەلەر كۇشىنە ەنەدى: تروتۋارلارمەن جۇرۋگە تولىق تىيىم سالىنادى، ال جول جۇرۋگە تەك كامەلەتكە تولعان، كەز كەلگەن ساناتتاعى جۇرگىزۋشى كۋالىگى بار ادامدارعا عانا رۇقسات ەتىلەدى. بۇل تۋرالى Orda.kz حابارلايدى.
الماتى قالالىق كوممۋنيكاسيالار قىزمەتىندە وتكەن بريفينگتە الداعى رەفورمالار، ايىپپۇلدار مەن كوشەلەردى تاستالعان كولىكتەردەن تازارتۋ تۋرالى پوليسيا دەپارتامەنتىنىڭ رەسمي وكىلى سالتانات ازىربەك ايتىپ بەردى.
پوليسيانىڭ مالىمدەۋىنشە، جاڭا زاڭ نورمالارى الماتىلىق ساموكاتشىلاردىڭ ءومىرىن «بۇرىن» جانە «كەيىن» دەپ بولەدى. 25 تامىزعا دەيىن ەلدە وتپەلى كەزەڭ جۇمىس ىستەيدى: جاياۋ جۇرگىنشىلەر ايماقتارى مەن تروتۋارلاردا جۇرۋگە ازىرگە بارلىعىنا، ونىڭ ىشىندە جۇرگىزۋشى كۋالىگى جوق ادامدارعا دا رۇقسات، ءبىراق جىلدامدىق ساعاتىنا 10 كم-مەن شەكتەلگەن. پوليسيا ءقازىردىڭ وزىندە داعدىلاردى وزگەرتۋگە شاقىرادى.
«25 تامىزدان باستاپ تالاپتار بىركەلكى بولادى. جاياۋ جۇرگىنشىلەر ايماعى مەن تروتۋارعا شىعۋعا بولمايدى. ساموكاتتار تەك ۆەلوجولدار مەن ۆەلوجولاقتارمەن جۇرە الادى. ولار بولماسا – جولدىڭ وڭ جاق شەتىمەن. ءبىراق وعان تەك كامەلەتكە تولعان، كەز كەلگەن ساناتتاعى جۇرگىزۋشى كۋالىگى بار ازاماتتار عانا جىبەرىلەدى»، – دەدى سالتانات ازىربەك.
پوليسيا بۇل ۇدەرىستى شەرينگتىك كومپانيالارمەن بىرلەسىپ رەتتەۋدى جوسپارلاپ وتىر. پايدالانۋشىلار جۇرگىزۋشى كۋالىگىنىڭ بار ەكەنىن راستامايىنشا كولىكتى جالعا الا المايدى. مۇنداي فۋنكسيا قوسىمشالاردا بۇرىننان بار، ءبىراق ازىرگە قولدانىلمايدى. تىيىم سالىنعان ايماققا، مىسالى تروتۋارعا نەمەسە جاياۋ جۇرگىنشىلەر كوشەسىنە كىرگەندە، ساموكات جىلدامدىعىن بىرتىندەپ ساعاتىنا 2–3 كم-گە دەيىن ازايتىپ، سودان كەيىن تولىعىمەن بۇعاتتالادى.
پوليسيا قاتاڭ شەكتەۋلەردى قاۋىپسىزدىك قاجەتتىلىگىمەن تۇسىندىرەدى. جىل باسىنان بەرى الماتىدا ساموكاتتار قاتىسقان 83 جول-كولىك وقيعاسى تىركەلگەن. ادام ءولىمى بولماعانىمەن، شامامەن 90 ادام جاراقات الدى.
سالتانات ازىربەك وتكەن جىلدارداعى قايعىلى وقيعالارعا مىسال كەلتىردى: تروتۋارلاردا ايەلدەر مەن بالالاردى قاعىپ كەتكەن، ال ءبىر جاعدايدا ساموكاتتاعى ەرلى-زايىپتى ارىققا قۇلاپ، قىز ومىرمەن سىيىسپايتىن جاراقات العان.
ايتا كەتەرلىگى، كيكشەرينگتىك ەلەكتروساموكاتتارعا ارنالعان ەرەجەلەر جەكە مەنشىك كولىككە قولدانىلمايدى: ول ءۇشىن جەكە ءنومىر مىندەتتى ەمەس. سونداي-اق جىلدامدىق شەكتەۋلەرى وعان قاتىستى ما، بەلگىسىز.
ءتىلشىنىڭ پوليسيا قىزمەتكەرلەرىنىڭ قىزمەتتىك ەلەكتروساموكاتتارىنا قاتىستى شەكتەۋلەر تۋرالى سۇراعىنا سالتانات ازىربەك ۆەدومستۆودا ميكروموبيلدى كولىك پاركى جوق – ساموكاتتاردى كيكشەرينگتىك كومپانيا بەرەتىنىن ايتتى.
«بۇل ساموكاتتاردا جىلدامدىقتىڭ باعدارلامالىق شەكتەۋى بار، ولار ساعاتىنا 25 كم-دەن جىلدام جۇرمەيدى. سوندىقتان ساموكات پاترۋلدەرى دە ءدال وسىنداي جىلدامدىق شەكتەۋلەرىن ساقتايدى»، – دەدى ول.
بۇعان دەيىن ءبىز كومپانيالار مەن جەكە كاسىپكەرلەر جالعا بەرەتىن ەلەكتروساموكاتتاردى ەسەپكە الۋ جانە تىركەۋ نومىرلەرىن بەرۋ ەرەجەلەرى تۋرالى ايتقان بولاتىنبىز.