پاۆلودار وبلىسىندا ەر ادام ماس كۇيىندە جانە جۇرگىزۋشى كۋالىگىنسىز ەلەكتروۆەلوسيپەدپەن جۇرگەنى ءۇشىن 20 تاۋلىككە قامالدى. وقيعا 4 تامىزدا اتامەكەن اۋىلىندا بولعان، دەپ حابارلايدى infohub.kz.
شامامەن تاڭعى 06:30-دا پوليسيا قىزمەتكەرلەرى مەملەكەتتىك تىركەۋ ءنومىرى جوق Linkon ماركالى ەلەكتروۆەلوسيپەدتى باسقارعان ازاماتتى توقتاتتى. تەكسەرۋ بارىسىندا ونىڭ كولىك قۇرالىن باسقارۋ قۇقىعى جوق ەكەنى، سونداي-اق الكوگولدىك ماساڭ كۇيدە ەكەندىگى انىقتالدى.
سوت وتىرىسىندا قۇقىقبۇزۋشى كىناسىن مويىنداپ، الدىڭعى كۇنى الكوگول ىشكەنىن، ال تاڭەرتەڭ ەلەكتروۆەلوسيپەدپەن دۇكەنگە بارعانىن، سوندا پوليسيا توقتاتقانىن ءتۇسىندىردى. مەديسينالىق كۋالاندىرۋ جەڭىل دارەجەدەگى الكوگولدىك ماساڭ كۇيدى راستادى.
پاۆلوداردىڭ اكىمشىلىك قۇقىقبۇزۋشىلىقتار جونىندەگى مامانداندىرىلعان اۋدانارالىق سوتى ەلەكتروۆەلوسيپەدتىڭ تەحنيكالىق سيپاتتامالارى بويىنشا L1/ا1 ساناتىنداعى كولىك قۇرالدارىنا جاتاتىنىن جانە موپەدكە تەڭەستىرىلەتىنىن، ونى باسقارۋ ءۇشىن ءتيىستى جۇرگىزۋشى كۋالىگى قاجەت ەكەنىن انىقتادى.
ءىس ماتەريالدارىن، ونىڭ ىشىندە مەديسينالىق كۋالاندىرۋ قورىتىندىسىن، بەينەجازبالاردى، اكىمشىلىك قۇقىقبۇزۋشىلىق تۋرالى حاتتامانى جانە پوليسيا دەپارتامەنتىنىڭ ازاماتتىڭ جۇرگىزۋشى كۋالىگىنىڭ جوقتىعى تۋرالى مالىمەتتەرىن زەرتتەي كەلە، سوت ونىڭ كىناسىن دالەلدەندى دەپ تانىدى. سوت قاۋلىسىمەن ازامات ك. ق ر اقبتك-نىڭ 608-بابىنىڭ 6-بولىگىندە كوزدەلگەن اكىمشىلىك قۇقىقبۇزۋشىلىقتى جاساعانى ءۇشىن كىنالى دەپ تانىلىپ، وعان 20 تاۋلىك مەرزىمگە اكىمشىلىك قاماققا الۋ جازاسى تاعايىندالدى. قاۋلى زاڭدى كۇشىنە ەندى.