الماتىدا مونودوڭگەلەكتەر، ەلەكتروسكەيتتەر مەن جىلدامدىعى جوعارى ەلەكتروۆەلوسيپەدتەر سانىنىڭ كۇرت وسۋىنە بايلانىستى بۇل قۇرىلعىلار ازىرگە قۇقىقتىق ايادان تىس. ولاردىڭ مارتەبەسىن رەتتەۋ ءۇشىن پوليسيا دەپارتامەنتى زاڭناماعا وزگەرىستەر ەنگىزۋدى دايىنداپ جاتىر، دەپ حابارلايدى infohub.kz.
وڭىرلىك كوممۋنيكاسيالار قىزمەتىندە وتكەن ءباسپاسوز ءماسليحاتىندا پوليسيا دەپارتامەنتىنىڭ وكىلى سالتانات ازىربەك مونودوڭگەلەكتىڭ رەسمي تۇردە كولىك قۇرالى رەتىندە تانىلماعانىن ايتتى. سونىمەن قاتار قالا كوشەلەرىندە ەلەكترلىك سكەيتتەر ءجيى كەزدەسەدى. پوليسيا ءاربىر جاڭا قۇرىلعى ءۇشىن جەكە زاڭ ازىرلەۋدىڭ ءتيىمسىز ەكەنىن ەسكەرىپ، ولاردى باسقا ءىرى قالالارداعىداي جەكە جىلجىمالى قۇرالدارعا (ججق) تەڭەستىرۋدى ۇسىنىپ وتىر. بۇل يەلەردىڭ قۇقىقتارى مەن مىندەتتەرىن زاڭ جۇزىندە بەكىتەدى.
«مونودوڭگەلەك – كولىك قۇرالى رەتىندە بەكىتىلمەگەن، ءبىراق ول دا جەكە جىلجىمالى قۇرال. قالادا ولاردىڭ سانى ارتتى. ەلەكتر باسقارۋىنداعى سكەيتتەر دە پايدا بولدى. سوندىقتان جاقىن ارادا الماتى قالالىق پوليسيا دەپارتامەنتى بارلىق جەكە جىلجىمالى قۇرالدار بويىنشا ۇسىنىس ەنگىزەدى»، – دەدى سالتانات ازىربەك.
جاياۋ جۇرگىنشىلەر مەن قوعام بەلسەندىلەرى ەلەكتر ساموكاتتاردىڭ تروتۋاردان جولعا اۋىستىرىلۋىن وڭ باعالادى، الايدا ەلەكتروۆەلوسيپەدتەرگە قاتىستى جاعداي شيەلەنىسىپ تۇر. كۋرەرلەر مەن اۋىر ەلەكتر بايكتەردى پايدالاناتىن قالا تۇرعىندارى ءالى دە تروتۋارمەن ءجۇرىپ، نارازىلىق تۋدىرۋدا.
«ماسەلەنىڭ مانىندە ولاردىڭ بارلىعىن جەكە جىلجىمالى قۇرالدار (ججق) ساناتىنا جات قىزىپ، زاڭناما دەڭگەيىندە مىندەتتەرىن بەلگىلەۋ قاجەت»، – دەپ ءتۇسىندىردى سپيكەر.
ەكى دوڭعالاقتى كولىك رەفورماسىنان كەيىن ەلەكتروۆەلوسيپەدتەردىڭ تانىمالدىلىعى كۇرت ءوستى. قازاقستاندا 2025 جىلعى 5 ساۋىردەن باستاپ موپەدتەردى مىندەتتى تىركەۋ ەنگىزىلدى، سوندىقتان كوپتەگەن يەلەر جاڭا تالاپتاردان قاشۋ ءۇشىن جىلدامدىعى جوعارى ەلەكتر بايكتەرگە اۋىستى.
قولدانىستاعى ەرەجەلەردە قۋاتتى ەلەكتروۆەلوسيپەدتەرگە ارنالعان بولەك سانات جوق، سوندىقتان ولار موپەدتەرگە تەڭەستىرىلەدى. مۇنداي قۇرىلعىلاردىڭ يەلەرى كولىكتى مامانداندىرىلعان حالىققا قىزمەت كورسەتۋ ورتالىعىندا تىركەۋدەن وتكىزىپ، مەملەكەتتىك ءنومىر الىپ، ساقتاندىرۋ راسىمدەپ، تەحپاسپورتىن وزىمەن بىرگە الىپ ءجۇرۋى ءتيىس.
«ولار بۇل راسىمنەن ءوتىپ، مەملەكەتتىك تىركەۋ ءنومىرىن دە، ساقتاندىرۋدى دا الۋى كەرەك، تەحپاسپورتىن وزىمەن بىرگە الىپ ءجۇرىپ، موپەد پايدالانۋشىلارى سياقتى جاۋاپكەرشىلىك ارقالايدى»، – دەدى سالتانات ازىربەك.
ەسكە سالايىق، 25 تامىزدان باستاپ الماتىدا ەلەكتر ساموكاتتارعا قاتىستى جاڭا ەرەجەلەر كۇشىنە ەنەدى: تروتۋارمەن جۇرۋگە تولىق تىيىم سالىنىپ، ولاردى تەك جۇرگىزۋشى كۋالىگى بار ادامدار عانا جالعا الا الادى.