قازاقستان بانكتەرىندەگى بارلىق دەپوزيتتەردىڭ 40 پايىزعا جۋىعى الماتى تۇرعىندارىنا تيەسىلى — ولار شامامەن 9،6 ترلن تەڭگە جيناعان، دەپ حابارلايدى infohub.kz سايتى.
جاقىندا قازاقستاندىق بانكتەردەگى حالىق دەپوزيتتەرى رەكورد جاڭارتىپ، العاش رەت 30 ترلن تەڭگەدەن استى. الايدا Finprom پورتالىنىڭ ايتۋىنشا، رەزيدەنت ەمەستەردىڭ شوتتارى مەن كارتوچكالارداعى اقشانى الىپ تاستاساق، سوما ءبىرشاما قاراپايىم بولادى — 24،9 ترلن تەڭگە.
بۇل سوما وڭىرلەر بويىنشا بىركەلكى بولىنبەگەن. دەپوزيتتەردەگى قاراجاتتىڭ 40 پايىزعا جۋىعى، ياعني شامامەن 9،6 ترلن تەڭگە، الماتى سالىمشىلارىندا. ەكىنشى ورىندا استانا (3،2 ترلن)، ءۇشىنشى ورىندا قاراعاندى وبلىسى (1،4 ترلن). بەستىككە سونداي-اق باتىس قازاقستان وبلىسى (1،2 ترلن) مەن شىمكەنت (1،1 ترلن تەڭگە) كىردى.
دەپوزيتتەردە ەڭ از اقشا جەتىسۋ (303،9 ملرد)، الماتى وبلىسى (232،4 ملرد) جانە ۇلىتاۋ (168،2 ملرد تەڭگە) تۇرعىندارىندا ساقتاۋلى.
ال جيناقتالعان جالپى سومانى وڭىرلەردىڭ حالقىمەن سالىستىراتىن بولساق، ءار الماتىلىققا ورتا ەسەپپەن 4،1 ملن تەڭگە شاماسىندا تيەدى. سالىستىرۋ ءۇشىن: قازاقستان بويىنشا بۇل كورسەتكىش ورتا ەسەپپەن نەبارى 1،2 ملن تەڭگەنى قۇرايدى. استانادا ءار ادامعا 1،9 ملن تەڭگە، ال شىمكەنتتە — 803،9 مىڭ تەڭگە تيەسىلى. ەڭ تومەن كورسەتكىش الماتى وبلىسىندا تىركەلگەن — ءار ادامعا ورتا ەسەپپەن نەبارى 144،1 مىڭ تەڭگە.
وسىلايشا، دەپوزيتتەر بويىنشا كوشباسشىلار مەن اۋتسايدەرلەر اراسىنداعى الشاقتىق 25 ەسەدەن اسادى. ساراپشىلاردىڭ پىكىرىنشە، بۇل قازاقستان وڭىرلەرى بويىنشا حالىقتىڭ جيناق دەڭگەيىندەگى ەلەۋلى ديففەرەنسياسيانى كورسەتەدى.
ايتا كەتەيىك، بۇعان دەيىن ەكىنشى دەڭگەيدەگى كەيبىر بانكتەر وزدەرىنىڭ دەپوزيتتىك ونىمدەرى بويىنشا سىياقى مولشەرلەمەلەرىن تومەندەتكەن بولاتىن.