2026 جىلعى ماۋسىمدا Enbek.kz ەلەكتروندى ەڭبەك بيرجاسىنا جۇمىس بەرۋشىلەر 108،7 مىڭ بوس ورىن، ال ۇمىتكەرلەر 126،7 مىڭ تۇيىندەمە ورنالاستىردى. مامىر ايىمەن سالىستىرعاندا بوس ورىندار سانى 25،4%-عا، تۇيىندەمەلەر سانى 38،3%-عا ارتقان. بۇل تۋرالى infohub.kz سايتى حابارلايدى.
ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى پلاتفورماداعى ەڭبەك نارىعى مامىر مەرەكەلەرى كەزىندەگى ماۋسىمدىق قۇلدىراۋدان كەيىن قالپىنا كەلگەنىن اتاپ ءوتتى. جۇمىس كۇشى ۇسىنىسىنىڭ ماۋسىمدىق ارتۋى، سونىڭ ىشىندە وقۋ ورىندارىن بىتىرۋشىلەردىڭ ەڭبەك نارىعىنا شىعۋىنا بايلانىستى.
سالالىق سۇرانىس قۇرىلىمىندا ءبىلىم بەرۋ (19،2 مىڭ)، وزگە دە قىزمەت تۇرلەرىن ۇسىنۋ (16،5 مىڭ)، اۋىل، ورمان جانە بالىق شارۋاشىلىعى (12،1 مىڭ)، دەنساۋلىق ساقتاۋ جانە الەۋمەتتىك قىزمەت كورسەتۋ (9،5 مىڭ)، قۇرىلىس (8،4 مىڭ) جانە وڭدەۋ ونەركاسىبى (7،3 مىڭ) كوش باستاپ تۇر.
وڭىرلىك بولىنىستە ەڭ كوپ بوس جۇمىس ورنى تۇركىستان وبلىسىندا (12،3 مىڭ)، استانادا (8،5 مىڭ)، جامبىل وبلىسىندا (7،0 مىڭ) جانە قاراعاندى وبلىسىندا (6،7 مىڭ) جاريالانعان.
ماۋسىم ايىندا ەڭ جوعارى جالاقى ۇسىنىلعان بوس ورىندار قاتارىندا ديۆيزيون ديرەكتورى (1،98 ملن تەڭگە)، باسقارما باستىعىنىڭ ورىنباسارى (1،38 ملن تەڭگە) جانە ۇڭعىما ينجەنەرى (1،31 ملن تەڭگە) لاۋازىمدارى ەرەكشەلەنەدى. ال ۇمىتكەرلەر اراسىندا ەڭ جوعارى جالاقى كۇتۋلەرى ۇشقىش (3،4 ملن تەڭگە)، جۇيەلىك ارحيتەكتور (2،5 ملن تەڭگە) جانە حيرۋرگ دارىگەر (2 ملن تەڭگە) لاۋازىمدارىنا ۇمىتكەرلەردە تىركەلگەن.
ۇمىتكەرلەردىڭ باسىم بولىگى (49%) 35 جاسقا دەيىنگى جاس ساناتىندا ەكەنى بايقالادى.