قازاقستاندا جارتىجىلدىق قورىتىندىسى بويىنشا جۇمىسسىزدىق دەڭگەيى 4،5% بولدى، ال مەديسينالىق-الەۋمەتتىك ساراپتامالاردىڭ 45%-دان استامى قاشىقتىقتان جۇرگىزىلۋدە. ق ر ەڭبەك جانە حالىقتى الەۋمەتتىك قورعاۋ ءمينيسترى اسقاربەك ەرتاەۆتىڭ توراعالىعىمەن كەڭەيتىلگەن القا وتىرىسى ءوتىپ، وندا 2026 جىلدىڭ ءبىرىنشى جارتىسىنىڭ قورىتىندىسى شىعارىلىپ، جىل سوڭىنا دەيىنگى مىندەتتەر بەلگىلەندى، دەپ حابارلايدى infohub.kz سايتى.
ءبىرىنشى ۆيسە-مينيستر ەربول تۋياقبايەۆ ەڭبەك قۇقىقتارىن قورعاۋ جۇمىسىنىڭ ناتيجەلەرى تۋرالى باياندادى. ونىڭ ايتۋىنشا، مەملەكەتتىك ينسپەكتورلار التى ايدا 3607 تەكسەرىس جۇرگىزگەن – بۇل وتكەن جىلدىڭ وسى كەزەڭىمەن سالىستىرعاندا 22،6%-عا ارتىق. باقىلاۋ بارىسىندا ەڭبەك زاڭناماسىنىڭ 4 مىڭنان استام بۇزۋشىلىعى انىقتالىپ، جۇمىس بەرۋشىلەرگە 2،3 مىڭنان استام مىندەتتى نۇسقاما بەرىلىپ، اكىمشىلىك ىقپال شارالارى قابىلدانعان.
ۆيسە-مينيستر ەلدار كۋزەنبايەۆ ەڭبەك نارىعىنداعى احۋالدى باياندادى. ول جارتىجىلدىق قورىتىندى بويىنشا ەلدە جۇمىسسىزدىق دەڭگەيى 4،5% قۇراعانىن اتاپ ءوتتى. ونىڭ سوزىنشە، جۇمىسپەن قامتۋ قىزمەتىنىڭ باسىم باعىتتارىنىڭ ءبىرى – مەملەكەتتىك قىزمەتتەردىڭ جەدەلدىگى مەن ساپاسىن ارتتىرۋ ءۇشىن سيفرلىق تەحنولوگيالار مەن جاساندى ينتەللەكت نەگىزىندەگى شەشىمدەردى ەنگىزۋ.
ۆيسە-مينيستر ۆيكتوريا شەگاي مەديسينالىق-الەۋمەتتىك ساراپتاما مەن الەۋمەتتىك قورعاۋ جۇيەسىنىڭ دامۋى جونىندە اقپارات بەردى. ول ءماس-تىڭ قاشىقتىق فورماتى كەڭەيىپ كەلە جاتقانىن اتاپ ءوتىپ، بۇگىندە ساراپتامالاردىڭ 45%-دان استامى وسى فورماتتا جۇرگىزىلىپ جاتقانىن مالىمدەدى. الەۋمەتتىك قورعاۋ سالاسىنداعى جۇمىس كەشەندى تۇردە – زاڭنامانى جاڭارتۋ، سيفرلىق سەرۆيستەردى دامىتۋ، وڭالتۋ ينفراقۇرىلىمىن كۇشەيتۋ جانە مەملەكەتتىك باقىلاۋدى كۇشەيتۋ ارقىلى جۇرگىزىلۋدە.