قىرعىزستاننىڭ ەنەرگوجۇيەسى قازاقستاننىڭ ءبىرىڭعاي ەلەكتر ەنەرگەتيكالىق جۇيەسىندەگى تەحنولوگيالىق بۇزىلىستان كەيىن ۋاقىتشا وقشاۋلانعان رەجيمگە كوشتى، دەپ حابارلايدى infohub.kz.
قىرعىز رەسپۋبليكاسى ەنەرگەتيكا مينيسترلىگىنىڭ مالىمەتىنشە، 2026 جىلعى 14 تامىزدا ساعات 15:34-تە قازاقستان ەنەرگوجۇيەسىنىڭ سولتۇستىك جانە وڭتۇستىك بولىكتەرىن جالعايتىن جوعارى ءۆولتتى جەلىدەگى سىرتقى اجىراتۋ سالدارىنان ورتالىق ازيانىڭ بىرىككەن ەنەرگوجۇيەسى (وابەج) وقشاۋلانعان ەنەرگوتۇيىنگە ءبولىندى.
«قىرعىز رەسپۋبليكاسىنىڭ ەنەرگوجۇيەسى ۋاقىتشا وقشاۋلانعان رەجيمگە كوشتى. جابدىقتى ساقتاۋ ءۇشىن اۆتوماتيكا رەگلامەنتكە سايكەس ىسكە قوسىلدى»، — دەپ اتاپ ءوتتى مينيسترلىكتە.
جاعداي ەنەرگەتيكتەردىڭ باقىلاۋىندا. ماماندار جۇمىس رەجيمىن تۇراقتاندىرۋ جانە ەلەكترمەن جابدىقتاۋدىڭ قالىپتى سحەماسىن قالپىنا كەلتىرۋ ءۇشىن قاجەتتى شارالاردى قابىلداۋدا.
«قازىرگى ۋاقىتتا اجىراتىلعان ابونەنتتەر جوق، تۇتىنۋشىلاردى ەلەكترمەن جابدىقتاۋ ۇزدىكسىز جۇزەگە اسىرىلۋدا. ەلەكتر ەنەرگياسىنداعى قىسقا مەرزىمدى ۇزىلىستەردىڭ سەبەبى تۋرالى اقپارات قوسىمشا بەرىلەتىن بولادى»، — دەپ تۇيىندەدى مينيسترلىكتە.
ەسكە سالايىق، 2026 جىلعى 14 تامىزدا ساعات 14:37-دە قازاقستاننىڭ ءبىرىڭعاي ەلەكتر ەنەرگەتيكالىق جۇيەسىندە «اعادىر – ۇلكەن» ل-5300 جانە ل-5320، سونداي-اق «اقتوعاي – تالدىقورعان» ل-5400 500 كۆ ەلەكتر بەرۋ جەلىلەرىنىڭ اجىراۋىمەن تەحنولوگيالىق بۇزىلىس بولدى.