قازاقستاننىڭ وڭتۇستىك وڭىرلەرىندەگى جاپپاي ەلەكتر قۋاتىنىڭ ءوشىرىلۋى ورتالىق ازيا ەلدەرىنىڭ ىرگەلەس ەنەرگوجۇيەلەرىندە پايدا بولعان اۆاريالىق تەڭگەرىمسىزدىكتەن ورىن الدى. ق ر ەنەرگەتيكا مينيسترلىگى قالىپتاسقان جاعدايعا رەسمي تۇسىنىكتەمە تاراتتى، دەپ حابارلايدى infohub.kz سايتى.
ۆەدومستۆونىڭ مالىمەتىنشە، وقيعا 2026 جىلعى 14 تامىزدا كۇندىزگى ۋاقىتتا بولىپ، بىرىككەن ەنەرگوجۇيەنىڭ تۇراقتىلىعىنا بىردەن اسەر ەتتى. ەلەكتر قۋاتىنىڭ كۇرت ارتۋى اۆارياعا قارسى اۆتوماتتاندىرۋدىڭ ىسكە قوسىلۋىنا سەبەپ بولىپ، كەيبىر وڭىرلەردە ءبىرقاتار تۇتىنۋشىلاردىڭ وشىرىلۋىنە اكەلدى.
«2026 جىلعى 14 تامىزدا ورتالىق ازيا ەنەرگوجۇيەسى تاراپىنان ەلەكتر قۋاتىنىڭ كۇرت وزگەرۋىنەن ەنەرگوجۇيەدە قۋات بالانسىنىڭ اۆاريالىق بۇزىلۋى ورىن الدى. ناتيجەسىندە اۆارياعا قارسى اۆتوماتتاندىرۋ ىسكە قوسىلىپ، كەيبىر وڭىرلەردە ءبىرقاتار ەلەكتر تۇتىنۋشىلارىنىڭ وشىرىلۋىنە اكەلدى»، — دەپ حابارلادى ق ر ەنەرگەتيكا مينيسترلىگى.
ءدال وسى اۆارياعا قارسى قورعانىس ۇلتتىق جەلى ءۇشىن ودان دا اۋىر زارداپتاردىڭ الدىن الىپ، ەلدىڭ وڭتۇستىگىندەگى ءبىرقاتار قالالار مەن وبلىستاردى، ونىڭ ىشىندە الماتى مەن الماتى وبلىسىن ۋاقىتشا جارىقسىز قالدىردى.
قازىرگى ۋاقىتتا ۇلتتىق ەلەكتر جەلىسىنىڭ جۇيەلىك وپەراتورى «KEGOC» اق جۇكتەمەنى كەزەڭ-كەزەڭمەن كوتەرۋ جانە تۇتىنۋشىلارعا كەرنەۋ بەرۋ ءۇشىن شۇعىل قالپىنا كەلتىرۋ جۇمىستارىن جۇرگىزۋدە. مينيسترلىك جاعدايدىڭ تولىق باقىلاۋدا ەكەنىن جەتكىزدى. ۆەدومستۆو اۆاريانى جويۋ بارىسى مەن ەلەكترمەن جابدىقتاۋدى تولىق قالپىنا كەلتىرۋدىڭ ناقتى ۋاقىتى تۋرالى قوسىمشا اقپارات بەرەتىنىن ۋادە ەتتى.
ەسكە سالايىق، الماتىدا ەلەكتر قۋاتىنىڭ وشىرىلۋىنە بايلانىستى قالا ءىس جۇزىندە توقتاپ قالدى. باعدارشامدار جۇمىس ىستەمەيدى، سورعى ستانسيالارىنىڭ توقتاۋىنان شۇمەكتەردە سۋ جوق.