پاۆلودار جانە ماڭعىستاۋ وبلىستارىندا جۇمىسسىز تۇرعىنداردى اۆتوماتتى تۇردە انىقتاپ، ولارعا جۇمىس ۇسىناتىن جۇيە ىسكە قوسىلدى. پيلوتتىق جوبا 59 مىڭنان استام ادامدى قامتىدى، ال قاراشا ايىنان باستاپ سيفرلىق ەڭبەك قىزمەتىن قازاقستاننىڭ باسقا وڭىرلەرىنە دە تاراتۋ جوسپارلانىپ وتىر، دەپ حابارلايدى infohub.kz سايتى.
پلاتفورمانى ەڭبەك كۇنىنە وراي وتكەن «ەڭبەك – ەل مۇراتى» ءىس-شاراسىندا پرەمەر-مينيستر ولجاس بەكتەنوۆكە تانىستىردى. سول جەردە كادرلار دايارلاۋ جانە وندىرىستەگى قاۋىپسىزدىكتى قامتاماسىز ەتۋ، ونىڭ ىشىندە جاساندى ينتەللەكت قولدانىلاتىن شەشىمدەر دە كورسەتىلدى.
سونىمەن قاتار ۇكىمەت جاڭا ەڭبەك باعدارلاماسىن ازىرلەپ جاتىر. ونداعى باستى نازار كاسىپورىنداردىڭ سۇرانىسىن ەسكەرە وتىرىپ كاسىبي وقىتۋعا جانە سيفرلىق داعدىلاردى دامىتۋعا اۋدارىلادى. جىل سوڭىنا دەيىن كاسىبي ستاندارتتارمەن 600 جۇمىسشى كاسىبىن قامتۋ جوسپارلانۋدا.
ۇكىمەت دەرەكتەرىنە سايكەس، جىل باسىنان بەرى 475 مىڭنان استام قازاقستاندىق جۇمىسپەن قامتىلدى. ەلەكتروندىق ەڭبەك بيرجاسىندا 800 مىڭنان استام بوس ورىن بار.
ءىس-شارا قورىتىندىسى بويىنشا پرەزيدەنت قاسىم-جومارت توقاەۆتىڭ اتىنان 37 ادام ماراپاتتالدى: 18 ادام «قۇرمەت» وردەنىمەن، ەكەۋى «ەڭبەك داڭقى» III دارەجەلى وردەنىمەن، تاعى 17 ادام «ەرەن ەڭبەگى ءۇشىن» مەدالىمەن ماراپاتتالدى. ماراپاتتالعاندار اراسىندا جۇرگىزۋشىلەر، ماشينيستەر، توكارلار، سلەسارلار، ينجەنەرلەر، مەحانيزاتورلار، الەۋمەتتىك قىزمەتكەر جانە جاتتىقتىرۋشى بار. ولاردىڭ ەڭبەك ءوتىلى 15 پەن 53 جىل ارالىعىندا.
بۇعان دەيىن «كۋرسيۆ» 2026 جىلى قازاقستاندا 547،7 مىڭ ادامدى جۇمىسپەن قامتۋ جوسپارلانىپ وتىرعانىن جازعان بولاتىن.