الەمگە ايگىلى يسپان ءانشىسى ەنريكە يگلەسياس ەلوردادا وتكەن كونسەرتتەن كەيىن قازاقستانداعى جانكۇيەرلەرىنە العىسىن ءبىلدىردى، دەپ حابارلايدى infohub.kz سايتى.
الەم جۇلدىزى 3 قىركۇيەكتە استانادا وتكەن كونسەرتتىڭ بەينەجازباسى مەن فوتوسۋرەتتەرىن Instagram-دا جاريالاپ، كورەرمەندەرگە ريزاشىلىعىن ءبىلدىردى. "استانا! قازاقستانداعى العاشقى شوۋىم ءۇشىن راحمەت!" — دەپ جازدى ءارتىس.
جاريالانىم بىردەن " قىزىل جۇرەكشەلەر" مەن تولعاندىرارلىق پىكىرلەردىڭ كوپتەپ جينالۋىنا سەبەپ بولدى. جانكۇيەرلەر ەموسيالارىن ايامادى: "بۇل كەرەمەت كەش بولدى، راحمەت"، "ءبىز سەنى جاقسى كورەمىز"، "باتىر"، "ءبىز سەنى قايتا-قايتا كۇتەمىز"، "ۇمىتىلماس ساتتەر ءۇشىن راحمەت. كەشە تاماشا بولدى"، "تاعى ءبىر الەمدىك تۋر، وتىنەمىن"، "كەرەمەت داۋىس جاندى تەبىرەنتەدى".
ەسكە سالايىق، بيىلعى جىلدىڭ ناۋرىز ايىندا ەنريكە يگلەسياس قازاقستاندا ەكى كونسەرت وتەتىنىن مالىمدەگەن بولاتىن: 3 قىركۇيەكتە استانادا جانە 5 قىركۇيەكتە الماتىدا. ەلورداداعى ونەر كورسەتۋ الدىندا ءانشى قالادان العاشقى كادرلاردى ءبولىستى، ال جانكۇيەرلەر ونى اۋەجايدا قارسى الدى. شوۋدان كەيىن قازاقستاندىق تانىمال تۇلعالار دا الەۋمەتتىك جەلىلەردە ءوز اسەرلەرىمەن ءبولىستى.