تانىمال يسپان ءانشىسى ەنريكە يگلەسياس قازاقستاندىق كورەرمەنگە قايتا جولىقتى: ول Instagram-دا استانا مەن الماتىداعى كونسەرتتەرىنەن ۆيدەو جاريالاپ، جانكۇيەرلەرگە جىلى قابىلداعانى ءۇشىن تاعى دا العىس ايتتى، دەپ حابارلايدى infohub.kz سايتى.
«قازاقستان، ۇمىتىلماس ەكى كەش ءۇشىن راحمەت»، — دەپ جازدى ءارتىس، جازباسىنا ساحناداعى ۆيدەوسىن قوسا سالىپ.
ءانشىنىڭ قازاقستاندىق جانكۇيەرلەرى يگلەسياستىڭ رەسپۋبليكاداعى كونسەرتتەرى تۋرالى العاشقى جازبا ەمەس ەكەنىنە نازار اۋداردى. پىكىرلەردە ولار كوپتەگەن لەبىز قالدىردى: «قازاقستان تۋرالى بەسىنشى جازبا»، «ءالى كۇنگە دەيىن بۇكىل قازاقستان اسەردە»، «راحمەت، ەرەكە! ءسىز كوپتەگەن ميللەنيالداردىڭ ارمانىن ورىندادىڭىز»، «تاعى كۇتەمىز، ەندى بىلەمىز — قايتا كەلەدى. بۇل جولى بۇيرەگىمدى ساتسام دا، فان-زوناعا بارامىن».
بۇعان دەيىن يسپان ءانشىسى استاناداعى كونسەرتتەن كەيىن قازاقستاندىق جانكۇيەرلەرگە جولىعىپ، ونەر كورسەتكەن كەزدە جىلى قابىلداعانى ءۇشىن قازاقستاندىقتارعا العىس ايتقان بولاتىن. وتاندىق شوۋ-بيزنەس جۇلدىزدارى دا يگلەسياستىڭ قازاقستان استاناسىنداعى ونەر كورسەتۋىنەن كەيىن اسەرلەرىمەن ءبولىستى.