ەنريكە يگلەسياستىڭ الماتىداعى كونسەرتىندە ءتارتىپتى ەكى مىڭعا جۋىق پوليسيا قىزمەتكەرى قامتاماسىز ەتەدى. ول 5 قىركۇيەكتە، سەنبى كۇنى ورتالىق ستاديوندا وتەدى. قۇقىق قورعاۋ ورگاندارى كۇشەيتىلگەن جۇمىس رەجيمىنە كوشەدى، دەپ حابارلايدى infohub.kz سايتى.
ءتارتىپ ساقشىلارى سپورت نىسانىنىڭ اۋماعىندا دا، وعان ىرگەلەس كوشەلەردە دە كەزەكشىلىك ەتەدى. كورەرمەندەردى كىرگىزۋ 16:00-دە باستالادى. نەگىزگى كىرەبەرىستەر اباي داڭعىلى مەن بايتۇرسىنوۆ كوشەسى جاعىنان اشىلادى. VIP Standing ساناتىنداعى بيلەت يەلەرى ءۇشىن ساتپايەۆ كوشەسى جاعىندا جەكە كىرەبەرىس قاراستىرىلعان.
كونسەرت اياقتالعاننان كەيىن بىرنەشە باعىت بويىنشا قوسىمشا شاتتلدار جىبەرىلەدى: اۋەجايعا، وربيتا شاعىن اۋدانىنا، الماتى-1 ۆوكزالىنا، رايىمبەك داڭعىلى — الاتاۋ كوشەسىنە، سونداي-اق «الماتى ارەناعا».
ستاديونعا كىرەر الدىندا بارلىق كورەرمەندەر تەكسەرۋدەن وتەدى. كەلۋشىلەردەن ءىس-شارا ەرەجەلەرىمەن الدىن الا تانىسىپ، تىيىم سالىنعان زاتتاردى الىپ كەلمەۋ سۇرالادى. سونداي-اق پوليسيا قىزمەتكەرلەرى مەن باقىلاۋشىلاردىڭ تالاپتارىن ورىنداۋ قاجەت.
الماتى اكىمدىگى كورەرمەندەردى ستاديونعا الدىن الا كەلۋگە شاقىرادى، بۇل ادامداردىڭ كوپ جينالۋىن بولدىرماۋعا جانە كونسەرتتىڭ باسىنا كەشىكپەۋگە مۇمكىندىك بەرەدى.