تانىمال ءانشى ەنريكە يگلەسياس Instagram-دا «استانا ارەنا» ستاديونىنىڭ جانىندا قازاقستاندىقتاردىڭ سيارامەن بىرگە ورىنداعان «Takin' Back My Love» ءانىنىڭ اۋەنىمەن لەزگينكا بيلەگەن ۆيدەوسىن ءبولىستى. روليككە ول قىسقاشا «كازاحستان» دەپ قول قويدى، دەپ حابارلايدى infohub.kz.
بۇل جاريالانىم ءانشىنىڭ قازاقستاندىق جانكۇيەرلەرى اراسىندا قىزۋ تالقىلاۋ تۋدىردى. پىكىرلەردە ولار: «بۇل — 40 گرادۋس تەمپەراتۋراداعى ءتۇس سياقتى»، «قازاقستان — كوپۇلتتى دوستىق ەل! ءبىز الەمدىك جۇلدىزدارعا ءارقاشان قۋانىشتىمىز»، «قازاقستاندا 130-دان استام ۇلت وكىلدەرى ءتاتۋ-تاتتى ءومىر سۇرەدى» دەپ جازدى.
ءتۇسىرىلىمنىڭ ءمان-جايىن قازاقستاندىق ءسالىم ايلازوۆ اشىپ ايتتى. ونىڭ شاكىرتتەرى ستاديون ماڭىندا بيلەگەن. ول بۇل — ءوزىنىڭ ءانسامبلى ەكەنىن، يگلەسياستىڭ وپەراتورى ءبىر كۇن بۇرىن ولارعا كەلىپ، ۆيدەونى انشىگە جىبەرەتىنىن ايتقانىن جەتكىزدى. «ءبىز سەنبەگەن ەدىك، ەندى سەنەمىز»، — دەدى ۇستاز.
پوست استىنداعى پىكىرلەردە ءسالىم ايلازوۆ ەنريكە يگلەسياسقا العىس سوزدەرىمەن دە جۇگىندى: «قۇرمەتتى ەنريكە يگلەسياس، كەرەمەت كونسەرتىڭىز ءۇشىن زور العىس! ءسىز ءبىزدى بالالىق شاعىمىزعا قايتاردىڭىز جانە تاماشا ەستەلىكتەر سىيلادىڭىز. قازاقستان — 140 ەتنوس وكىلدەرى بىرگە تۇراتىن كوپۇلتتى ەل، ءارقايسىمىز ءسىزدى قايتا كورگەنىمىزگە شىن جۇرەكتەن قۋاندىق. ءبىز ءۇشىن سىزگە ونەر كورسەتۋ ۇلكەن باقىت پەن مارتەبە بولدى. وسى ۇمىتىلماس كەش ءۇشىن راحمەت!»
ەسكە سالايىق، بۇگىن يگلەسياس الماتىدا كونسەرت بەرەدى. بۇعان دەيىن ورتالىق ستاديوندا جانە وعان ىرگەلەس اۋماقتا 2 مىڭعا جۋىق پوليسيا قىزمەتكەرى جۇمىلدىرىلاتىنى حابارلانعان بولاتىن. ءانشىنى الماتىدا جانكۇيەرلەرىمەن سۋرەتكە تۇسكەن كەزدە بايقاعان.