ورتالىق كوممۋنيكاسيالار قىزمەتىندە وتكەن بريفينگتە 2026 جىلعى نەگىزگى ۇلتتىق ءبىرىڭعاي تەستىلەۋدىڭ (ۇبت) قورىتىندىسى شىعارىلدى. تەستىلەۋ 10 مامىردان 10 شىلدەگە دەيىن ءوتتى، دەپ حابارلايدى infohub.kz سايتى.
قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ مالىمەتىنشە، تەستىلەۋگە 233 مىڭ تالاپكەر قاتىستى. ەكى مۇمكىندىكتى ەسكەرگەندە، ۇبت 422 مىڭ رەت تاپسىرىلدى. ونىڭ ىشىندە 73،1% تالاپكەر قازاق تىلىندە، 26،8% – ورىس تىلىندە، ال 0،16% (383 ادام) – اعىلشىن تىلىندە تاپسىردى.
ەڭ سۇرانىسقا يە بەيىندىك پاندەر كومبيناسيالارى «ماتەماتيكا-فيزيكا»، «بيولوگيا-حيميا» جانە «شىعارماشىلىق ەمتيحان» بولدى.
عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتورايىمى گۇلجان جاراسوۆا: «ينجەنەرلىك باعىتتارعا دەگەن قىزىعۋشىلىقتىڭ جوعارى بولۋى، سوڭعى جىلدارى پرەزيدەنتتىڭ تاپسىرماسى بويىنشا مەملەكەتتىك ءبىلىم گرانتتارىنىڭ باسىم بولىگىنىڭ ءدال وسى سالالارعا بولىنۋىمەن بايلانىستى»، – دەپ اتاپ ءوتتى.
ونىڭ ايتۋىنشا، 2026 جىلى ۇبت فورماتى وزگەرىسسىز قالدى: تالاپكەرلەر ءۇش مىندەتتى جانە ەكى بەيىندىك ءپاندى تاپسىردى. ماكسيمالدى ناتيجە – 140 بالل، تەستىلەۋ ۇزاقتىعى – 4 ساعات.
ءقازىر مەملەكەتتىك ءبىلىم گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتار قابىلداۋ جالعاسۋدا. قۇجاتتاردى 20 شىلدەگە دەيىن (سونىڭ ىشىندە) جوعارى وقۋ ورىندارىنىڭ قابىلداۋ كوميسسيالارىنا (ونىڭ ىشىندە ۆيرتۋالدى) نەمەسە eGov.kz پورتالى ارقىلى تاپسىرۋعا بولادى.
قاتىسۋ ءۇشىن جەكە كۋالىك، ۇبت سەرتيفيكاتى، ءبىلىمى تۋرالى قۇجات، فوتوسۋرەت جانە (بار بولسا) جەڭىلدىك ساناتتارى بويىنشا قاتىسۋ قۇقىعىن راستايتىن قۇجاتتاردى ۇسىنۋ قاجەت. مەملەكەتتىك ءبىلىم گرانتتارىنىڭ يەگەرلەرىنىڭ ءتىزىمى 10 تامىزعا دەيىن جاريالانادى.