ەۋروپالىق كوميسسيا ءتوراعاسى ۋرسۋلا فون دەر ليايەن ەۋروپالىق وداقتىڭ بۇكىل اۋماعىندا 13 جاسقا تولماعان بالالارعا الەۋمەتتىك جەلىلەردى پايدالانۋعا تىيىم سالۋدى جوسپارلاپ وتىرعانىن مالىمدەدى، دەپ حابارلايدى infohub.kz سايتى.
ونىڭ ايتۋىنشا، جاس ەۋروپالىقتار كۇنىنە ءتورت-التى ساعات ەكرانعا قاراپ وتىرادى، ويتكەنى الگوريتمدەر ولاردىڭ نازارىن تىم قاتتى ۇستاپ قالادى.
«ءبىز بالالارىمىزدىڭ تولىق تۇتقىنعا تۇسكەنىن كورىپ وتىرمىز. ولاردىڭ نازارى، زەيىنى، ساناسى باۋراپ الىندى. بۇل بالالاردى بالالىق شاعىنان ايىرادى»، — دەدى ول.
فون دەر ليايەن كامەلەتكە تولماعانداردىڭ الەۋمەتتىك جەلىلەردى پايدالانۋىنا قاتاڭ شەكتەۋلەر قاراستىراتىن «بالالاردى قورعاۋ تۋرالى» زاڭدى قابىلداۋ جوسپارىن جاريالادى.
«ءبىز كەزەڭ-كەزەڭىمەن جانە سارالانعان ءتاسىلدى قولدانامىز. ءار جاستىڭ ءوز ەرەكشەلىگى بار، سوندىقتان ءارقايسىسى ءۇشىن جەكە قورعاۋ دەڭگەيى بولادى. 13 جاسقا تولماعان ادامدارعا الەۋمەتتىك جەلىلەردى پايدالانۋعا تىيىم سالىنادى. 15 جاسقا تولماعان ادامدارعا جەكە اككاۋنت اشۋعا تىيىم سالىنادى. بۇل 13 پەن 15 جاس ارالىعىنداعىلارعا اتا-اناسى نەمەسە قامقورشىسى جاساپ، باقىلايتىن، فۋنكسيالارى شەكتەۋلى جانە كۇنىنە ءبىر ساعاتتان اسپايتىن ۋاقىت شەكتەۋى بار ميني-اككاۋنتتارعا عانا رۇقسات ەتىلەتىنىن بىلدىرەدى، ال 15 پەن 18 جاس ارالىعىنداعىلار ءۇشىن پلاتفورمالار ءقاۋىپسىز ديزاين ەنگىزۋگە مىندەتتى بولادى»، — دەدى ەۆروكوميسسيا ءتوراعاسى.
ول ەۋرووداق تاۋەلدىلىك تۋدىراتىن فيلمدەر مەن سەريالدارعا، سونداي-اق بالالاردىڭ بارعان سايىن ەكسترەمالدى كونتەنتكە اۋەستەنۋىنە جول بەرمەيتىنىن قوستى.
«ەندى پلاتفورمالار بىزگە وزدەرىنىڭ قاۋىپسىزدىگىن دالەلدەۋگە مىندەتتى بولادى، ويتكەنى بۇل — كامەلەتكە تولماعاندارىمىزدىڭ الەۋمەتتىك جەلىلەرگە قول جەتكىزۋى تۋرالى ەمەس. بۇل — ءبىز الەۋمەتتىك جەلىلەرگە كامەلەتكە تولماعاندارىمىزعا قاشان جانە قالاي قول جەتكىزۋگە رۇقسات بەرەتىنىمىز تۋرالى. ەۋروپانىڭ ارەكەت ەتۋگە قۇقىعى بار. ەرەجەنى ءىرى تەحنولوگيالىق كومپانيالار ەمەس، ءبىز بەلگىلەيمىز»، — دەپ اتاپ ءوتتى ول.