ەۋروپالىق وداق 16 جاسقا تولماعان بالالاردىڭ الەۋمەتتىك جەلىلەردى پايدالانۋىن شەكتەۋدى كوزدەيتىن جوسپارىن جاريالادى. بۇل قادام بالالاردىڭ ءال-اۋقاتىن جاقسارتىپ، ينتەرنەتتەگى قاۋىپسىزدىكتى قامتاماسىز ەتۋگە باعىتتالعان، دەپ حابارلايدى infohub.kz سايتى.
جوسپار بويىنشا، بالالاردىڭ الەۋمەتتىك جەلىگە كىرۋىنە بىرتىندەپ كوشۋ قاراستىرىلعان. اتاپ ايتقاندا، 13 جاسقا تولماعاندارعا پلاتفورمالارعا كىرۋگە تولىق تىيىم سالىنادى.
ال 13 پەن 15 جاس ارالىعىنداعى جاسوسپىرىمدەر پلاتفورمالارعا تاۋلىگىنە ءبىر ساعات قانا كىرە الادى. ول ءۇشىن اتا-اناسىنىڭ نەمەسە قامقورشىسىنىڭ الەۋمەتتىك جەلىدەگى اككاۋنتى ارقىلى اشىلعان «شاعىن اككاۋنتتار» پايدالانىلادى.
ەۋروپالىق كوميسسيا الەۋمەتتىك جەلى كومپانيالارى ءوز پلاتفورمالارىنىڭ باستاپقى جوباسىنان-اق ءقاۋىپسىز ەكەنىن دالەلدەۋى ءتيىس ەكەنىن مالىمدەدى. ەۋروپالىق وداق باسشىسى ۋرسۋلا فون دەر ليايەن بۇل قادام «اتا-انالاردى باسقارۋ تىزگىنىنە قايتارادى» دەپ اتاپ ءوتتى.
ونىڭ سوزىنشە، «ەو بالالار تۋرالى اكت» دەپ اتالعان زاڭناما اتا-انالارعا «بالالارىنا ءقاۋىپسىز الەمدە جول تابۋعا كومەكتەسەتىن قۇرالداردى» بەرەدى.
اتالعان اكتىگە سايكەس، تەك 15 جاسقا تولعان بالالار عانا وزدەرىنىڭ جەكە الەۋمەتتىك جەلى اككاۋنتتارىن اشا الادى.
ۋرسۋلا فون دەر ليايەن بۇعان دەيىن ەۋروپاداعى بالالار ءۇشىن الەۋمەتتىك جەلىگە «كىدىرتۋ» ەنگىزۋدى ۇسىنعان بولاتىن. ول مامىر ايىندا «الەۋمەتتىك جەلىگە ەڭ تومەنگى جاس شەگىن بەلگىلەۋ تۋرالى تالقىلاۋدى ەندى ەلەمەۋگە بولمايدى» دەگەن ەدى.
بەيسەنبى كۇنى رەسمي تۇردە جاريالانعان بۇل ساياسات سارسەنبى كۇنى ەو باسشىسىنىڭ ەۋروپالىق پارلامەنتتە سويلەگەن جىلدىق بايانداماسىندا دا ايتىلعان بولاتىن.
كەيبىر جەكەلەگەن ەو ەلدەرى، سونىڭ ىشىندە فرانسيا مەن يسپانيا، بالالاردىڭ الەۋمەتتىك جەلىگە كىرۋىن شەكتەۋ جونىندە وزدەرىنىڭ جەكە جوسپارلارىن جاريالاپ ۇلگەردى.