ەۋروپالىق وداق كاناداعا قاۋىمداس مۇشە بولۋ ەسىگىن ايقارا اشتى. بۇل تۋرالى ەۋروپالىق كوميسسيا ءتوراعاسى ۋرسۋلا فون دەر ليايەن ەۋرووداقتىڭ جىل سايىنعى جولداۋىندا مالىمدەدى، دەپ حابارلايدى infohub.kz سايتى.
ونىڭ ايتۋىنشا، ەۋرووداق پەن كانادا «الەمگە ءبىر كوزقاراسپەن قارايدى». بۇل جاساندى ينتەللەكت، كليماتتىڭ وزگەرۋى جانە گەوساياسات سياقتى ءتۇرلى سالالارعا قاتىستى.
«ءبىز بىرگە تۇردىق: ۋكراينادا، قورعانىستا، شيكىزاتتا جانە جەتكىزۋ تىزبەكتەرىندە. ءبىراق ەڭ باستىسى... ەۋروپا مەن كانادا دەموكراتياعا سەنەدى»، — دەدى ول.
سونىمەن قاتار فون دەر ليايەن ەنەرگەتيكا، ماڭىزدى مينەرالدار، باتارەيالار، جاساندى ينتەللەكت، كيبەرقاۋىپسىزدىك جانە ەكونوميكالىق قاۋىپسىزدىكتى ىنتىماقتاستىقتىڭ باسقا دا سالالارى رەتىندە اتادى.
بۇل قادام اقش-تىڭ ترامپ اكىمشىلىگى كەزىندە ەۋرووداق مۇشەلەرىنە دە ساۋدا تاريفتەرى سالىنعان تۇستا جاسالىپ وتىر.
فون دەر ليايەن سونداي-اق رەسەي تاراپىنان قۇرلىققا ءتونىپ تۇرعان ءقاۋىپ اياسىندا ۇلىبريتانيا مەن ۋكراينانى قامتيتىن ەۋروپالىق قاۋىپسىزدىك كەڭەسىن قۇرۋدى ۇسىندى.
«ءبىز ۇزاق ۋاقىت بويى كانادا، نورۆەگيا، ۋكراينا، ۇلىبريتانيا جانە باسقالار سياقتى سەرىكتەستەرمەن قۇرلىعىمىزدىڭ قاۋىپسىزدىگىنە باعىتتالعان كوشباسشىلار فورماتىن تالقىلادىق»، — دەدى ول كەڭ اۋقىمدى جولداۋىندا.
«ءقازىر تاۋەكەلدەردىڭ سيپاتى مەن اۋقىمىن ەسكەرسەك، بۇل ودان ءارى شۇعىل بولىپ وتىر. سوندىقتان ءبىز ەۋروپالىق قاۋىپسىزدىك كەڭەسىن شىندىققا اينالدىرۋ جونىندەگى يدەيالارىمىزدى ۇسىنامىز»، — دەپ قوستى ول.