ەۋروپالىق وداققا مۇشە ون سەگىز مەملەكەت ميگرانتتار اعىنىنا قارسى ءبىرىڭعاي مەحانيزم قۇرۋعا كەلىستى، دەپ حابارلايدى infohub.kz سايتى.
جاڭا شارالار تۋرالى Bild باسىلىمى مالىمدەدى. ولاردى قابىلداۋ ماسەلەسى سەۋتاداعى داعدارىستان كەيىن تۋىنداعانى اتاپ ءوتىلدى، الايدا كەزدەسۋدە يسپانيا وكىلدەرى بولمادى. ەۋروپا سوڭعى وقيعالاردان كەيىن سىرتقى شەكارالارىندا ميگرانتتاردىڭ كەنەتتەن اعىلۋىنا دايىندالماق.
گەرمانيانىڭ ىشكى ىستەر ءمينيسترى الەكساندر دوبريندت جانە ەو-نىڭ ىشكى ىستەر مەن ميگراسياعا جاۋاپتى تاعى 17 ءمينيسترى وسىنداي ميگراسيالىق داعدارىستارعا جاۋاپ بەرۋدىڭ جالپىەۋروپالىق مەحانيزمىن ازىرلەۋدى كوزدەپ وتىر.
باسىلىم دەرەگىنشە، مينيسترلەر ءۇش تارماقتان تۇراتىن جوسپارعا كەلىستى. ءبىرىنشىسى — سىرتقى شەكارالارداعى جاعدايدى توتەنشە دەپ تانۋعا مۇمكىندىك بەرەتىن ەو ءۇشىن ءبىرىڭعاي ولشەمدەردى ەنگىزۋ. ەكىنشى تارماققا سايكەس، داعدارىس تۋىنداعان جاعدايدا ميگرانتتاردى جەدەلدەتىپ شىعارۋعا بولادى. ءۇشىنشى تارماق سىرتقى شەكارادا داعدارىسقا تاپ بولعان ەو ەلىنە 24 ساعات ىشىندە Frontex جەدەل ارەكەت ەتۋ كۇشتەرىن جىبەرۋگە مۇمكىندىك بەرەتىن قولداۋ مەحانيزمىن قۇرۋدى كوزدەيدى.
بۇعان دەيىن 30-31 شىلدەگە قاراعان ءتۇنى مىڭداعان ماروككولىق ميگرانت سولتۇستىك افريكاداعى يسپانيانىڭ سەۋتا ەكسكلاۆىنداعى شەكارانى بۇزعانى حابارلانعان — يسپانيا بيلىگى اسكەردى جۇمىلدىردى.
يسپانيا بيلىگى جۇما كۇنى كەشكە قاراي ميگرانتتاردىڭ كوپشىلىگى سەۋتادان كەتىپ، ماروككوعا ورالعانىن اتاپ ءوتتى. باستاپقىدا شەكارالىق قورشاۋ ورناتىلعان قابىرعا ارقىلى جاعاعا شىعۋعا تىرىسقانداعى قىسىلىستا كەمىندە 57 ميگرانت قازا تاپقانى، ولاردىڭ دەنەلەرى سۋدان الىنعانى حابارلانعان.
سونىمەن قاتار ماروككو ءىىم ميگرانتتاردىڭ يسپانياعا باسىپ كىرۋىنە نە سەبەپ بولعانىن ءتۇسىندىردى. بولعان جاعداي جالعان اقپاراتپەن بايلانىستىرىلدى.
كەيىنىرەك ماروككولىق ميگرانتتار يسپانيادان بوسقىن مارتەبەسىن بەرۋدى تالاپ ەتتى. ولار ءوز تالاپتارىن ۇسىنىپ، نارازىلىق اكسياسىن وتكىزدى.