2026 جىلدىڭ 2 تامىزىنان باستاپ ەۋروپالىق وداقتا جاساندى ينتەللەكت تۋرالى زاڭنىڭ (AI Act) قولدانىلۋى باستالدى. ەۋروكوميسسيا ۇلتتىق بيلىك ورگاندارىمەن بىرلەسىپ، ديپفەيكتەردىڭ اشىقتىعىنا قويىلاتىن تالاپتاردى قوسا العاندا، جاڭا ەرەجەلەردى قولدانۋعا كىرىستى، دەپ حابارلايدى infohub.kz سايتى.
جاڭا نورمالار گەنەراسيالانعان كونتەنتتى تاڭبالاۋدى جانە پايدالانۋشىلارعا ولاردىڭ اداممەن ەمەس، چات-بوتپەن سويلەسىپ جاتقانىن حابارلاۋدى مىندەتتەيدى. ديپفەيكتەردە دە ماشينا وقي الاتىن ارنايى تاڭبا بولۋى كەرەك.
رەتتەۋشىلەر جالپى ماقساتتاعى جاساندى ينتەللەكت (GPAI) مودەلدەرىن ازىرلەۋشىلەرگە ەرەكشە نازار اۋدارادى. جۇيەلىك تاۋەكەلى جوعارى جەتىلدىرىلگەن جۇيەلەردى جەتكىزۋشىلەر كيبەرشابۋىلداردان، حيميالىق جانە بيولوگيالىق قاۋىپتەردەن قورعانۋ ءۇشىن قاتاڭ بەلگىلەنگەن قاۋىپسىزدىك شارالارىن ساقتاۋعا مىندەتتى. 180-نەن استام ۇيىم گەنەراسيالانعان كونتەنتتىڭ اشىقتىعى بويىنشا ارنايى پراكتيكا كودەكسىنە قول قويدى.
رەتتەۋشىلەرگە عىلىمي قولداۋدى 60 تاۋەلسىز ساراپشىدان تۇراتىن ساراپشىلار كەڭەسى كورسەتەدى. باس عىلىمي كەڭەسشى بولىپ وكسفورد ۋنيۆەرسيتەتىنىڭ پروفەسسورى الەسساندرو اباتە تاعايىندالدى. ەۋروكوميسسيانىڭ اتقارۋشى ۆيسە-پرەزيدەنتى حەننا ۆيركۋنەن بۇل قادامدار تەحنولوگياعا دەگەن سەنىمدى نىعايتاتىنىن اتاپ ءوتتى.