قازاقستاندىق سكريپكاشى ەراسىل حاميت، ۆەنا راديوسىنىڭ سيمفونيالىق وركەسترىنىڭ (ORF Radio-Symphonieorchester Wien) ءارتىسى، الماتىدا قۇرمانعازى اتىنداعى قازاق ۇلتتىق كونسەرۆاتورياسىنىڭ ەركەعالي راحمادييەۆ اتىنداعى ۇلكەن كونسەرت زالىنىڭ ساحناسىندا كونسەرت بەردى، دەپ حابارلايدى infohub.kz.
27 تامىزدا مۇندا «ۆەنادان بۋەنوس-ايرەسكە دەيىن» اتتى كونسەرت ءوتتى. وندا ۆەنا كلاسسيكاسى مەن ارگەنتينالىق تانگو تۋىندىلارى بىرىكتىرىلدى.
كەشتىڭ باستى وقيعاسى — ءحاميتتىڭ ليۋدۆيگ ۆان بەتحوۆەننىڭ سكريپكا مەن وركەسترگە ارنالعان كونسەرتىن ورىنداۋى بولدى. مۋزىكانتتىڭ ونەرىن كورەرمەن ۇزاق قوشەمەتپەن قارسى الدى.
ەراسىل حاميت ءۇشىن بۇل كونسەرتتىڭ ەرەكشە ءمانى بار. ونىڭ ايتۋىنشا، الماتى — ونىڭ اتا-بابالارىنىڭ، ونىڭ ىشىندە اتاسىنىڭ تاريحي وتانى.
«مەن ءۇشىن ءدال وسى جەردە، اتا-بابالارىم، سونىڭ ىشىندە اتام ءومىر ءسۇرىپ، ەڭبەك ەتكەن تاريحي وتاندا ونەر كورسەتۋ ۇلكەن مارتەبە. مەن بۇل توپىراقپەن ەرەكشە بايلانىستى سەزىنەمىن. بۇل زال تاماشا، ال كورەرمەننىڭ ىقىلاسى وتە جىلى بولدى — مۇنداي ساتتەر ەرەكشە شابىت بەرەدى»، — دەدى سكريپكاشى.
كەشتىڭ ەرەكشە ءساتى — كامەرالىق وركەستر قۇرامىندا ەراسىل ءحاميتتىڭ اتا-اناسىنىڭ قاتىسۋى بولدى. ولار ۇلىمەن بىرگە ساحناعا شىعىپ، وتباسىلىق مۋزىكالىق ءداستۇردى جالعاستىردى.
كونسەرتتىڭ ەكىنشى بولىمىندە استور پياسسوللانىڭ «بۋەنوس-ايرەستەگى جىل مەزگىلدەرى» سيكلى ورىندالدى. بۇل تۋىندى باعدارلامانىڭ جارقىن جالعاسى بولىپ، كورەرمەنگە اكادەميالىق مۋزىكا مەن ارگەنتينالىق تانگونىڭ ۇيلەسىمىن تىڭداۋعا مۇمكىندىك بەردى.
ءىس-شارا سوڭىندا پرەمەر-مينيستردىڭ ورىنباسارى — مادەنيەت جانە اقپارات ءمينيسترى ايدا بالاەۆانىڭ اتىنان ەراسىل حاميتكە قۇرمەت پەن العىس رەتىندە گۇل شوعى تابىس ەتىلدى.
ەسكە سالايىق، ەراسىل حاميت الماتىدا دۇنيەگە كەلگەن. ول سكريپكادا ويناۋدى سانكت-پەتەربۋرگتە، ماسكەۋدە، زالسبۋرگتە جانە ۆەنادا ۇيرەنگەن. قازاقستاندىق جوعارى ناگرادالارعا يە بولىپ، حالىقارالىق بايقاۋلاردا ايگىلى سيمفونيالىق وركەسترلەرمەن ونەر كورسەتەدى.