Eurasian Resources Group (ERG) يمپورتتى الماستىرۋ باعدارلاماسىنىڭ قورىتىندىسىن شىعاردى. باعدارلاما ەل ىشىندەگى قۇندىلىقتى ارتتىرۋعا جانە مەملەكەت باسشىسى مەن قازاقستان رەسپۋبليكاسى ۇكىمەتىنىڭ تاپسىرمالارى اياسىندا وتاندىق وندىرۋشىلەردى قولداۋعا باعىتتالعان. 2025 جىلى توپتىڭ جالپى كولەمى 1،8 ترلن تەڭگە بولاتىن ساتىپ الۋىنىڭ 1،32 ترلن تەڭگەسى قازاقستاندىق ءوندىرىستىڭ تاۋارلارى، جۇمىستارى مەن قىزمەتتەرىنە تيەسىلى بولدى، دەپ حابارلايدى infohub.kz سايتى.
سوڭعى بىرنەشە جىلدا ERG كاسىپورىندارى 55،7 ملرد تەڭگەگە 74 وفتەيك-كەلىسىمشارت جاساسىپ، قازاقستاندىق وندىرۋشىلەرگە ءوندىرىس اشۋ مەن كەڭەيتۋ ءۇشىن قاجەتتى كەپىلدى وتكىزۋ نارىعىن قامتاماسىز ەتتى. ەڭ ءىرى كەلىسىمشارتتار قاتارىندا: جابدىقتار مەن تەمىرجول تەحنيكاسىنا قوسالقى بولشەكتەر وندىرۋگە 12،3 ملرد تەڭگە، جارۋ قۇرالدارىن باستاۋعا 8،4 ملرد تەڭگە، ەلەكتر پەشى ترانسفورماتورلارىنا 5،7 ملرد تەڭگە، روتورلىق ەكسكاۆاتورلارعا شومىشتەرگە 2،5 ملرد تەڭگە، سورعىلارعا قوسالقى بولشەكتەرگە 1،4 ملرد تەڭگە.
سونىمەن قاتار، ERG وتاندىق وندىرۋشىلەرمەن جالپى سوماسى 196 ملرد تەڭگەگە 951 ۇزاق مەرزىمدى شارت جاساستى. توپتىڭ ساتىپ الۋلارىنداعى قازاقستاندىق تاۋارلاردىڭ ۇلەسى 52%-دان 63%-عا ءوستى.
«مەملەكەت باسشىسىنىڭ تاپسىرماسى ءبىز ءۇشىن ۇران ەمەس، وندىرىستىك جوسپار. ەل ىشىندەگى قۇندىلىقتىڭ ءاربىر پايىزىنىڭ ارتىندا قازاقستاندا قالاتىن ناقتى زاۋىتتار، جۇمىس ورىندارى مەن تەحنولوگيالار تۇر. ءبىز وتاندىق وندىرۋشىلەرگە جىلىنا جۇزدەگەن ميلليارد تەڭگە كولەمىندەگى نارىق اشتىق – جانە قازاقستاندا وندىرۋگە دايىندارعا تاپسىرىستارعا كەپىلدىك بەرۋگە ءازىرمىز»، – دەدى ERGء-نىڭ قازاقستانداعى باس ديرەكتورى قۇدرات شامييەۆ.
باعدارلامانى اۋقىمدى تۇردە جۇزەگە اسىرۋدىڭ ءبىر مىسالى – «ERG Service» ج ش س 2025 جىلى 94،3 ملرد تەڭگەگە ءونىم مەن قىزمەت ءوندىرىسىن جەرگىلىكتەندىردى: ەنەرگەتيكالىق جانە تاۋ-كەن كولىك جابدىقتارىن جوندەۋ، قۇيۋ جانە ماشينا جاساۋ ءوندىرىسى. بۇعان قوسا، قازاقستاندا ءاليۋمينيدى قايتا وڭدەۋدى دامىتۋ ءۇشىن ERG وتاندىق قورىتپا وندىرۋشىلەرگە مەتالدى لوندون مەتالل بيرجاسىنىڭ (LME) كوتيروۆكالارىنان 5% تومەن باعامەن جەتكىزەدى.
بۇگىندە ERGء-نىڭ يمپورتتى الماستىرۋ باعدارلاماسى قازاقستاندىق وندىرىسپەن الماستىرۋعا اشىق 21 مىڭ يمپورتتىق پوزيسيانى قامتيدى: كارەرلىك اۆتوشينالار مەن ەكسكاۆاتور شومىشتەرىنەن باستاپ ترانسفورماتورلار مەن ونەركاسىپتىك حيمياعا دەيىن. كەز كەلگەن قازاقستاندىق ءوندىرۋشى erg.kz جانە torgi.erg.kz الاڭدارىنداعى «يمپورتتى الماستىرۋ» بولىمىندە باعدارلاماعا قاتىسۋعا ءوتىنىم بەرە الادى. كومپانيادا ءوتىنىمدى تالداپ، شەشىم شىعارادى. وڭ شەشىم بولسا، تاۋار وندىرۋشىمەن شارت نەمەسە وفتەيك-كەلىسىمشارت جاسالادى.
ERG باعدارلامانى بىرنەشە باعىتتا دامىتۋدى جوسپارلاپ وتىر: توپ كاسىپورىندارىندا جەتكىزۋشىلەر ءۇشىن توقسان سايىن «اشىق ەسىك كۇندەرىن» وتكىزۋ، مەملەكەتتىك ورگاندارمەن كەزدەسۋلەر ۇيىمداستىرۋ، سونداي-اق قازاقستاننىڭ دامۋ بانكىمەن جانە ەكىنشى دەڭگەيلى بانكتەرمەن بىرلەسىپ وفتەيك-كەلىسىمشارتتاردى قارجىلاندىرۋ تەتىكتەرىن پىسىقتاۋ (ق ر «ونەركاسىپتىك ساياسات تۋرالى» زاڭىنا سايكەس).