ەرتىس وزەنىنىڭ ءبىرىڭعاي سيفرلىق پاسپورتى پايدا بولۋى مۇمكىن. وسىنداي باستامانى پاۆلوداردا وتكەن حالىقارالىق فورۋمدا شىعىس قازاقستان وبلىسىنىڭ اكىمى نۇرىمبەت ساقتاعانوۆ ۇسىندى، دەپ حابارلايدى infohub.kz سايتى.
«ەرتىس وزەنىنىڭ ءبىرىڭعاي سيفرلىق پاسپورتى» جاڭارتىلىپ وتىراتىن اقپاراتتىق جۇيەدە سۋ تەرەڭدىگى مەن ساپاسى، جاعالاۋ جاعدايى، بالىق قورى، كەمە جۇزەتىن ۋچاسكەلەر جانە گيدروتەحنيكالىق قۇرىلىستار تۋرالى دەرەكتەردى بىرىكتىرۋى ءتيىس. جاڭا جۇيەنىڭ ارقاسىندا وڭىرلەر تاسىمالداۋدى، ءتۇپ تەرەڭدەتۋ جۇمىستارىن جانە پورت ينفراقۇرىلىمىن جوسپارلاۋ كەزىندە ناقتى دەرەكتەردى پايدالانا الادى.
جۇيە قۇرۋ ءۇشىن شىعىس قازاقستان وبلىسىنىڭ اكىمى بىرلەسكەن جۇمىس توبىن قۇرۋدى ۇسىندى. ونىڭ قۇرامىنا قازاقستان مەن رەسەيدىڭ مەملەكەتتىك ورگاندارى، وڭىرلەرى جانە عىلىمي ۇيىمدارى كىرۋى مۇمكىن.
سونىمەن قاتار فورۋمدا زايسان كولىنىڭ جاعاسىنداعى تۇعىل اۋىلىندا سالىناتىن جاڭا پورت تانىستىرىلدى. جوبا ازىرگە پىسىقتاۋ ساتىسىندا تۇر. وعان نەگىز بولاتىن — قازىرگى ايلاق، قويمالار جانە ۇزىندىعى 99 شاقىرىمدىق تۇعىل – مايقاپشاعاي تەمىر جولى.
جاڭا پورت ارقىلى قۇم، گرانيت، قيىرشىق تاس جانە بەنتونيت تاسىمالداۋ جوسپارلانىپ وتىر. تاسىمال كولەمى ءبىر ناۆيگاسيادا ءۇش ميلليون توننادان اسۋى مۇمكىن، الايدا ونى جۇك جونەلتۋشىلەرمەن ءالى كەلىسىپ، باعىتتاردىڭ ەكونوميكاسىن ەسەپتەۋ قاجەت.
بۇعان دەيىن «كۋرسيۆ» قازاقستان، جۇڭگو جانە رەسەيدىڭ ەرتىس وزەنىن بىرلەسىپ پايدالانۋ جونىندە ءۇشجاقتى كونسۋلتاسيالار وتكىزۋدى پىسىقتاپ جاتقانىن جازعان. ساراپشىلار سۋ جانە ەكولوگيالىق قاۋىپسىزدىكتى ارتتىرىپ، ەنەرگەتيكالىق ينفراقۇرىلىمدى دامىتۋعا كومەكتەسەتىن ءىس-قيمىل جوسپارىن قۇرىپ قويدى.