قازاقستان، رەسەي جانە جۇڭگو ترانسشەكارالىق ەرتىس وزەنىن بىرلەسىپ پايدالانۋ ماسەلەلەرى بويىنشا ءۇشجاقتى كونسۋلتاسيالار وتكىزۋ مۇمكىندىگىن پىسىقتاپ جاتىر. بۇل تۋرالى «روسسيسكايا گازەتاعا» بەرگەن سۇحباتىندا رەسەي فەدەراسياسىنىڭ تابيعي رەسۋرستار جانە ەكولوگيا ءمينيسترى الەكساندر كوزلوۆ مالىمدەدى، دەپ حابارلايدى «ينتەرفاكس»، infohub.kz سايتىنا سىلتەمە جاساپ.
رەسەيدىڭ تابيعات قورعاۋ ۆەدومستۆوسى باسشىسىنىڭ ايتۋىنشا، رەسەي-قازاقستان بىرلەسكەن جۇمىس توبى ەرتىس وزەنىن سۋ شارۋاشىلىعى جانە سۋ-ەنەرگەتيكالىق ماقساتتا پايدالانۋ جوباسىن دايىنداۋدى قولعا العان. ساراپشىلار سۋ جانە ەكولوگيالىق قاۋىپسىزدىكتى ارتتىرۋعا، سونداي-اق ەنەرگەتيكالىق ينفراقۇرىلىمدى دامىتۋعا باعىتتالعان ءىس-شارالار جوسپارىن قۇردى.
«تاراپتار ءارقايسىسىنىڭ جاۋاپكەرشىلىك ايماعىن ايقىنداپ، جۇمىستاردى ەگجەي-تەگجەيلى سيپاتتايتىن، ورىندالۋ مەرزىمدەرى مەن ءار كەزەڭنىڭ قۇنىن كورسەتەتىن كۇنتىزبەلىك كەستەنى دايىندادى»، — دەدى كوزلوۆ.
مينيستر سونداي-اق قىتايدى تارتا وتىرىپ، جوبانى ءۇشجاقتى فورماتتا دامىتۋدىڭ ايتارلىقتاي الەۋەتى بار ەكەنىن اتاپ ءوتتى.
«ءقازىر ەرتىس بويىنشا ىنتىماقتاستىق پەرسپەكتيۆالارىن تالقىلاۋ ءۇشىن بەيىندى مينيسترلىكتەر دەڭگەيىندە ءۇشجاقتى كونسۋلتاسيالار وتكىزۋ مۇمكىندىگىن پىسىقتاپ جاتىرمىز»، — دەپ ناقتىلادى ول.
بۇعان دەيىن «كۋرسيۆ» قازاقستان مەن رەسەي ترانسشەكارالىق ەرتىس وزەنىن بىرلەسىپ باسقارۋ، سونداي-اق وندا تۋريزم مەن باسقا دا باعىتتاردى دامىتۋ نيەتىن بەكىتەتىن ارنايى حاتتاماعا قول قويعانىن حابارلاعان. ىنتىماقتاستىق جوسپارى ەكونوميكا مەن اۋىل شارۋاشىلىعىنان باستاپ سپورت، سيفرلاندىرۋ جانە جاستار ساياساتىنا دەيىنگى 30-دان استام سالانى قامتيدى.