جەتىسۋ وبلىسىندا سينتەتيكالىق ەسىرتكى ساتۋمەن اينالىسقان ۇيىمداسقان توپتىڭ سەگىز بولجامدى مۇشەسى ۇستالدى، دەپ حابارلايدى infohub.kz سايتى.
باس پروكۋراتۋرانىڭ ءباسپاسوز قىزمەتىنىڭ مالىمەتىنشە، جەتىسۋ وبلىسىندا قازاقستان رەسپۋبليكاسىنىڭ اۋماعىندا سينتەتيكالىق ەسىرتكى زاتتارىن زاڭسىز ساتۋمەن اينالىسقان ۇيىمداسقان توپتىڭ قىزمەتى توقتاتىلدى. جەدەل-ىزدەستىرۋ ءىس-شارالارى بارىسىندا سەگىز بولجامدى قاتىسۋشى ۇستالدى.
قىلمىستىق ءىس ماتەريالدارىنا سايكەس، قىلمىستىق ارەكەت شەتەلدەن ۇيلەستىرىلگەن. ۇيىمداستىرۋشى سينتەتيكالىق ەسىرتكى زاتتارىنىڭ جەتكىزىلۋىن قامتاماسىز ەتىپ، توپ مۇشەلەرىنىڭ اراسىندا رولدەردى ءبولىپ، جاسىرىن ورىنداردىڭ كوورديناتتارىن جىبەرىپ، قىلمىستىق تاپسىرمالاردىڭ ورىندالۋىن باقىلاپ، سونداي-اق كريپتوۆاليۋتا ارقىلى ەسەپ ايىرىسۋدى جۇزەگە اسىرعان.
الدىن الا انىقتالعانداي، توپ مۇشەلەرى ۇيىمداستىرۋشىنىڭ نۇسقاۋى بويىنشا تالدىقورعان، الماتى، قونايەۆ، قاسكەلەڭ جانە پاۆلودار قالالارىنىڭ اۋماعىندا جاسىرىن ورىندار جابدىقتاعان.
تەرگەۋ جانە جەدەل ءىس-شارالار بارىسىندا قۇرامىندا سينتەتيكالىق ەسىرتكى زاتى «مەفەدرون» بار دەپ بولجانعان ۇنتاق ءتارىزدى زات سالىنعان بۋمالار، سوت ساراپتاماسىنا جىبەرىلگەن باسقا دا زاتتار، دالەلدەمەلىك ءمانى بار اقپاراتى بار ۇيالى تەلەفوندار، سونداي-اق Exodus كريپتوۆاليۋتا ءاميانى ارقىلى ەسەپ ايىرىسۋ تۋرالى مالىمەتتەر الىندى.
انىقتالعان بارلىق فاكتىلەر بويىنشا قازاقستان رەسپۋبليكاسى قىلمىستىق كودەكسىنىڭ 297-بابىنا سايكەس قىلمىستىق ىستەر تەرگەلۋدە.
ۇيىمداستىرۋشىنىڭ جەكە باسىن، ونىڭ ورنالاسقان جەرىن، ەسىرتكى زاتتارىن جەتكىزۋ ارنالارىن، سونداي-اق قۇقىققا قارسى ارەكەتكە قاتىسى بار باسقا دا ادامداردى انىقتاۋعا باعىتتالعان تەرگەۋ جانە جەدەل-ىزدەستىرۋ ءىس-شارالارى جۇرگىزىلۋدە. سوتقا دەيىنگى تەرگەپ-تەكسەرۋدىڭ بارىسى جەتىسۋ وبلىسى پروكۋراتۋراسىنىڭ باقىلاۋىندا.