ەسسە: مەنىڭ قىزىعۋشىلىقتارىم

ەسسە
مەنىڭ قىزىعۋشىلىقتارىم
اقىل - ويعا جاققان ءبىلىم شىراعىن،
ۇستاز - دانا ۇلاعاتتى ءمۇعالىم.
شاكىرتىنىڭ ساناسىنا نۇر قۇيعان،
مەن ۇستازدىڭ ۇلىلىعىن ۇعامىن – دەگەندەي قازىرگى كەزدە مەكتەپتە جاس ۇرپاق تاربيەسى، ونىڭ جەكە تۇلعاسىنىڭ جاڭاشا قالىپتاسۋى، الەۋمەتتىك دۇنيەگە كوزقاراسى الدىمەن مۇعالىمگە بايلانىستى. قازىرگى زامان مۇعالىمىنەن ءوز ءپانىنىڭ تەرەڭ بىلگىرى بولۋىمەن قاتار، تاريحي، تانىمدىق، پەداگوگيكالىق - پسيحولوگيالىق، بىلىمدىلىك جانە اقپاراتتىق ساۋاتتىلىق تالاپ ەتىلۋدە.

ارينە، ۇستاز بولۋ، شاكىرت تاربيەلەۋ – ەكىنىڭ بىرىنە بۇيىرا بەرمەيتىن قاسيەت. مەنىڭ ۇستازدىق ماماندىعىن تاڭداۋداعى باستى ماقساتىم – تاربيە مەن ءبىلىم بەرۋدە، جان - جاقتى ادامگەرشىلىگى مول، دەنى ساۋ، ۇلتجاندى ازامات تاربيەلەۋ. اباي اتامىز ايتقانداي “ادامنىڭ ادامشىلىعى – جاقسى ۇستازدان باستالادى”. مەن دە وسىنداي بولعىم كەلەدى...

ۇستازدىق – ۇلى قۇرمەت. شاكىرتتەرىمدى ءبىلىم نارىمەن سۋسىنداتىپ، ءتالىم – تاربيە بەرۋ، جاقسى قاسيەتتەردى وقۋشىلاردىڭ بويىنا دارىتىپ، ادامگەرشىلىك رۋحتا باعىت – باعدار بەرۋ – مەنىڭ ەڭ باستى مىندەتتەرىم دەپ سانايمىن. ءمۇعالىم – ۇلى تۇلعا. وسى سوزدە قانشاما ۇعىم، ماعىنا بار. ۇستاز بولۋ جۇرەك جىلىلىعىن، مەيىرىم شۋاعىن بالانىڭ بويىنا دارىتۋ دەپ بىلەمىن. مەن وسى از عانا ۇستازدىق قىزمەتىمدە تەك ءمۇعالىم عانا ەمەس، انا، كەلىن، ارىپتەس، جاس مامان رەتىندە ارىپتەستەرىمنىڭ ءىس - تاجىريبەسىن ۇيرەنۋدەن جالىقپاي، ۇستازدارىمنىڭ بەرگەن اقىل - كەڭەسىن، ۇلگى - ونەگەسىن قاشاندا بيىك ۇستاپ، ۇلگى تۇتامىن.

مەن ءوز ءبىلىمىمدى شىڭداۋ ماقساتىندا ءبىلىم سالاسىندا بولىپ جاتقان جاڭالىقتارمەن تانىسىپ وتىرامىن. ساباق بەرۋدە جاڭا پەداگوگيكالىق تەحنولوگيالاردىڭ ءادىس - تاسىلدەرىن قولدانامىن. قازىرگى زامان تالابىنا ساي جاس ۇرپاققا ساپالى ءبىلىم بەرۋدە ەلەكتروندى وقىتۋ، قاشىقتىقتان ءبىلىم الۋ تەحنولوگيالارىن باسشىلىققا الا وتىرىپ، بالانىڭ وقۋعا دەگەن قۇشتارلىعىن وياتۋ ارقىلى وقۋشىنىڭ ءوز بەتىنشە جۇمىس ىستەۋىن قاداعالايمىن.

بولاشاقتا ۇرپاقتارىمىزدىڭ ساپالى ءبىلىم، سانالى تاربيە الۋىنا، حالقىمىزدىڭ ادال ۇلى مەن قىزدارى بولۋلارى ءۇشىن بار ۋاقىتىمدى اياماي، تالىمگەر ۇستازدارىمنىڭ ءىسىن جالعاستىرۋدا شاكىرتتەرىمنىڭ بيىك شىڭنان كورىنۋى ءۇشىن ايانباي ەڭبەك ەتەمىن دەپ سەنىم بىلدىرەمىن.