ەسسە
«مەنىڭ تاڭداۋىم پەداگوگ»
مارت ايىنىڭ سۋىق كۇندەرىنىڭ ءبىرى. دالادا كوكتەمنىڭ ىزعارى سەزىلەدى.
ۇيدەن شىعىپ كۇندەلىكتى جولىممەن ءوزىمنىڭ سۇيىكتى جۇمىسىم بالالار ۇيىنە بەتتەدىم. جولاي وسى جۇمىسىمنىڭ ءوزىمنىڭ سۇيىكتى ءىسىم ەكەنىنە ىشتەي تاۋبە قىلام. بالالار ءۇيى – بۇل مەنىڭ ەكىنشى وتباسىم، « ءومىرىمنىڭ جارتىسى». ءقازىر بالالار ءۇيىنىڭ تابالدىرىعىن اتتاسىمەن الدىمنان ءبىر - بىرىنە ۇقسامايتىن «مەنىڭ» بالالارىم جۇگىرىپ شىعادى. ولاردىڭ ءارقايسىسىنىڭ جۇرەكتەرى جارالى. تاعدىردىڭ سان قيلى سوقپاقتارىنان وتكەن، قانشاما قيىندىقپەن باقىتسىزدىقتى باستارىنان كەشكەن. مەن ولاردىڭ ءارقايسىسىن قۇشاعىما الىپ، جۇرەگىمنىڭ جىلۋىنىڭ شوكىمدەي بولسىن ءبىر بولىگىن سىيلاعىم كەلەدى. سول جان جىلۋىمدى ولارمەن ءبولىسىپ تە كەلەمىن. سوندىقتان دا بولار كەيبىر ەرەسەك ادامداردان بىردە - ءبىر كەم تۇسپەي، ولاردا ماعان قيىن - قىستاۋ كەزەڭدە دەمەۋ بولدى. ماعان بالالارمەن بىرگە وتكىزگەن ءاربىر ۋاقىتىم قىزىقتى. مەنىڭ بالالارىم،( مەن ولاردى «تاربيەلەنۋشىلەر» دەگەن قۇرعاق سوزبەن اتاعىم دا كەلمەيدى) اس ءپىسىرۋدى، كىر جۋۋدى، توقۋدى، بولمەلەرىن جيناۋدى ت. ب ءوز بەتتەرىنشە ىستەي الادى. ولاردىڭ بۇل جەتىستىكتەرىنە مەن تەك قۋانامىن. الىدە بولاشاق ومىرلەرىنە قاجەتتى كوپتەگەن نارسەنى ۇيرەتكىم كەلەدى. مەنىڭ ولاردان دا ۇيرەنگەنىم كوپ، توزىمدىلىككە، جاناشىرلىققا، كەڭپەيىلدىككە ۇيرەتتى. انا رەتىندە دە پەداگوگ رەتىندە دە تاربيەلەۋدى ءدال وسى بالالار ۇيىندە جۇمىس ىستەي ءجۇرىپ ۇيرەندىم. بالالاردىڭ ءارقايسىسى تۋرالى نەعۇرلىم تولىعىراق ءبىلۋدى ۇيرەندىم. تاربيەشىنىڭ جۇرەگى تەك قانا مەيىربان ەمەس كورەگەن بولۋ كەرەك، سول ارقىلى عانا ول ءوز بالالارىنىڭ جان دۇنيەسىن سەزىنە بىلەدى، تەك سونىمەن عانا بالالاردىڭ مەيىرىمدىلىك سەزىمىن وياتۋعا بولادى. مەنىڭ بالالارىمنىڭ مەنەن الارلارى دا كوپ. سول سەبەپتى مەن ولارعا تانىم جانە قارىم - قاتىناس باقىتىن سىيلايمىن. ويتكەنى مەن بالالارعا ار - ۇيات، مەيىرىمدىلىك سياقتى رۋحاني بايلىقتارىن ساقتاي وتىرىپ ءوز - وزدەرىن تانۋعا، ءوز مۇمكىندىكتەرىنە سەنە بىلۋلەرىنە، تابىسقا جەتۋگە كومەكتەسەتىن ادام، ياعني – تاربيەشىمىن. مۇمكىن مەن پەداگوگ رەتىندە وسى بالالار ۇيىندە قىزمەت ەتە ءجۇرىپ قالىپتاسقان شىعارمىن.
قيىن بالا بولمايدى، تەك ولارعا ۋاقىتىندا كومەك بەرە الماعان. سوندىقتان مەن ولارعا كومەكتەسۋدەمىن، ويتكەنى مەنىڭ تاڭداۋىم پەداگوگ.
«مىنە بار شىندىق وسى. مۇمكىن مەن مۇنى كەش ءتۇسىنىپ، كەش جازىپ وتىرعان شىعارمىن. دەگەنمەن، بۇل مەنىڭ ىشكى سىرىم»...