قازاقستاندا ەستۋ اپپاراتتارىن الۋ مۇمكىندىگى كەڭەيتىلۋدە: ەندى ولاردى ەستۋ قابىلەتى بۇزىلعان پاسيەنتتەر مەديسينالىق كورسەتىلىمدەر بويىنشا، ءتىپتى مۇگەدەكتىگى بولماسا دا الا الادى. جاڭا مەحانيزمدى دەنساۋلىق ساقتاۋ مينيسترلىگى ازىرلەدى، دەپ حابارلايدى infohub.kz سايتى.
ۆەدومستۆو بارلىق ۇيىمداستىرۋ شارالارى اياقتالعاننان كەيىن بۇل كومەكتى ەل بويىنشا مىڭداعان پاسيەنت پايدالانا الاتىنىن ۋادە ەتەدى.
وسى ۋاقىتقا دەيىن ەستۋ اپپاراتتارى تەك اۋىر ەستۋ بۇزىلىستارى بار مۇگەدەكتىكتىڭ جەكەلەگەن ساناتتارىنا تەگىن بەرىلەتىن. ەندى ولاردى الۋ قۇقىعىنا سۋردولوگ دارىگەر ەستۋ پروتەزدەۋىن تاعايىنداعان بارلىق پاسيەنت يە بولادى.
«ەستۋ رەابيليتاسياسىن ەرتە باستاۋ ءومىر ساپاسىن ساقتاۋعا، وقۋ، قارىم-قاتىناس جانە الەۋمەتتىك بەيىمدەلۋ مۇمكىندىكتەرىن جاقسارتۋعا كومەكتەسەدى»، — دەپ اتاپ ءوتتى دەنساۋلىق ساقتاۋ مينيسترلىگىنىڭ انا مەن بالا دەنساۋلىعىن قورعاۋ دەپارتامەنتى ديرەكتورىنىڭ مىندەتىن اتقارۋشى جانار سادۋوۆا.
ەستۋ اپپاراتىن الۋ ءۇشىن پاسيەنت سۋردولوگقا تەكسەرۋدەن ءوتۋى قاجەت. دارىگەر ەستۋ قابىلەتىنىڭ تومەندەۋ دارەجەسىن باعالايدى، قولايلى ۇلگىنى تاڭدايدى جانە مەديسينالىق قورىتىندى رەسىمدەيدى.
جاڭا جۇيە تەك ەستۋ اپپاراتىن بەرۋدى عانا ەمەس، سونىمەن قاتار قۇرىلعىنى جەكە تاڭداۋ مەن باپتاۋ، قۇلاققا ارنالعان ۆكلادىش جاساۋ، پاسيەنتتى وقىتۋ، سونداي-اق كەپىلدىك جانە كەپىلدىكتەن كەيىنگى قىزمەت كورسەتۋدى قامتيدى.
دەنساۋلىق ساقتاۋ مينيسترلىگىنىڭ دەرەگىنشە، ءارتۇرلى قۋاتتاعى، ەستۋ قابىلەتىنىڭ ءارتۇرلى دارەجەدەگى جوعالۋى بار پاسيەنتتەرگە ارنالعان زاماناۋي ەستۋ اپپاراتتارىنىڭ ءتىزىمى ءقازىردىڭ وزىندە قالىپتاستىرىلعان.