ساۋدا جانە ونەركاسىپ ءمينيسترى ارمان شاققالييەۆ ۇكىمەتتەگى بريفينگتە قازاقستانداعى ەت باعاسىنىڭ ءوسۋ سەبەپتەرىن ءتۇسىندىردى، دەپ حابارلايدى infohub.kz سايتى.
بريفينگ بارىسىندا جۋرناليستەر ەتتىڭ قايتادان ايتارلىقتاي قىمباتتاعانىن كورسەتەتىن ستاتيستيكالىق دەرەكتەردى كەلتىردى. ب ا ق مالىمەتىنشە، ءبىر جىل ىشىندە ەڭ قىمباتتاعان ءونىم قوي ەتى بولدى، ونىڭ ورتاشا باعاسى 27،7%-عا وسكەن. سيىر ەتى، تارتىلعان ەت جانە تاۋىقتىڭ جامباس بولىگى دە ايتارلىقتاي قىمباتتاعان. ءباسپاسوز وكىلدەرى مۇنداي ءوسۋدىڭ سەبەبى نەدە ەكەنىن سۇرادى.
«ءيا، شىنىمەن دە، ەت ونىمدەرى بويىنشا ديناميكانى كورىپ وتىرمىز. قازىرگى ۋاقىتتا باعا ديناميكاسىن الساق، ول قالىپتى، ءوسىم بايقالادى، ءبىراق قالىپتى ءوسىم. ەڭ باستىسى – ەت ساتىلىمدا بار. مىسالى، باعانى ءبىز وتكەن دەمالىس كۇندەرى نارىقتا باقىلادىق – 1 كگ ءۇشىن 3 700 تەڭگە. بۇل سۇيەكتى سيىر ەتى، ساۋدا جەلىلەرىندە ءسال جوعارىراق»، – دەدى ارمان شاققالييەۆ.
باعانىڭ ءوسۋىن ول ەتكە دەگەن جوعارى سۇرانىسپەن بايلانىستىردى. ونىڭ ايتۋىنشا، الەمنىڭ كوپتەگەن ەلدەرىندە سيىر ەتىن تۇتىنۋ ايتارلىقتاي ارتقان. «ءبىز جاھاندىق پروسەستەردىڭ اجىراماس بولىگىمىز، سوندىقتان، مىسالى، وزبەكستاندا ءوسىم بولسا، سۇرانىس جوعارى بولسا، ارينە، ءبىزدىڭ بيزنەس تاڭدايدى. پارسى شىعاناعىنداعى بەلگىلى وقيعالار قوي ەتى باعاسىنىڭ قۇبىلمالىلىعىنا اسەر ەتتى. ءبىراق تاعى دا اتاپ وتكىم كەلەدى، قازىرگى ۋاقىتتا ءبىز كۇرت ءوسۋدى بايقامايمىز. باعا، ءيا، وزگەرەدى، ءبىراق جالپى تۇراقتى، جانە مال شارۋاشىلىعى ونىمدەرىن جەتكىزۋدە قازىرگى ۋاقىتتا ۇزىلىستەر جوق»، – دەدى مينيستر.