ۇلىبريتانيا تۇرعىنى ەتەل كاتەرحەم 117 جاسقا تولعان تۋعان كۇنىن وتباسى مەن جاقىن دوستارىنىڭ ورتاسىندا اتاپ ءوتتى. ول تاريحتا وسىنداي جوعارى جاسقا جەتكەن العاشقى بريتاندىق اتاندى، دەپ حابارلايدى infohub.kz سايتى.
مەرەيگەر لوندونعا جاقىن ورنالاسقان سۋررەي گرافتىعىنداعى قارتتار ۇيىندە تۇرادى. مەرەكەسىن ول تۋىستارى مەن دوستارىنىڭ قاسىندا وتكىزدى. ۇزاق جاساعان قارياعا قۇتتىقتاۋلار الەمنىڭ تۇكپىر-تۇكپىرىنەن، سونىڭ ىشىندە پلانەتاداعى ەڭ كارى ەر ادام دەپ تانىلعان برازيليانىڭ 113 جاستاعى تۇرعىنى جۋان مارينو نەتودان دا كەلدى.
ەتەل كاتەرحەم 1909 جىلى 21 تامىزدا دۇنيەگە كەلگەن. ول ومىرىندە كورول ەدۋارد VIIء-نىڭ بيلىگىن، ەكى دۇنيەجۇزىلىك سوعىستى، «تيتانيكتىڭ» اپاتىن جانە كوروناۆيرۋس پاندەمياسىن كوردى. 18 جاسىندا بولاشاق رەكوردشى ءۇندىستانعا كەتىپ، وندا كۇتۋشى بولىپ جۇمىس ىستەدى. كەيىن ول بريتان ارمياسىنىڭ مايورى نورمان كاتەرحەمگە تۇرمىسقا شىقتى. جۇبايلار ءبىراز ۋاقىت گونكونگتا تۇرىپ، سودان كەيىن ۇلىبريتانياعا قايتىپ ورالدى.
ەتەل كۇيەۋىنەن دە، ەكى قىزىنان دا اسىرا ءومىر ءسۇردى. ءقازىر ونىڭ ءۇش نەمەرەسى جانە بەس شوبەرەسى بار. وعان الەمدەگى ەڭ كارى ادام مارتەبەسى 2025 جىلدىڭ ساۋىرىندە برازيليالىق موناح يناح كاناباررو لۋكاس قايتىس بولعاننان كەيىن اۋىستى.
ەتەل كاتەرحەم ءوزىنىڭ ۇزاق عۇمىرىنىڭ باستى قۇپياسىن ومىرگە سابىرلى قاراۋ جانە جانجالدان اۋلاق بولۋ دەپ سانايدى. ول بۇرىن ەشكىممەن ەشقاشان داۋلاسپايتىنىن، ءارقاشان اڭگىمەلەسۋشىلەردى مۇقيات تىڭدايتىنىن، ءبىراق سوڭىندا ءوزى قاجەت دەپ ساناعانداي ارەكەت ەتەتىنىن مويىنداعان. رەكوردقا قاراماستان، ءابسوليۋتتى الەمدىك تيتۋل ازىرگە 122 جىل 164 كۇن ءومىر سۇرگەن فرانسۋز ايەلى جاننا كالمانعا تيەسىلى.