2030 جىلعا قاراي ەۋروپا قىزمەت مەرزىمى اياقتالاتىن 1 ميلليوننان استام ەلەكتروموبيل اككۋمۋلياتورىن قايتا وڭدەۋ ماسەلەسىنە تاپ بولۋى مۇمكىن. ساراپشىلار ءقازىردىڭ وزىندە ءتيىستى ينفراقۇرىلىمدى دامىتۋعا شاقىرىپ وتىر، دەپ حابارلايدى infohub.kz سايتى.
الەمدە ەلەكتروموبيل ساتىلىمى ءوسىپ كەلەدى. ولاردىڭ ۇلەسى جاڭا كولىكتەردىڭ الەمدىك نارىعىنىڭ تورتتەن ءبىرىن قۇراپ وتىر، ال تەك 2026 جىلدىڭ ءبىرىنشى جارتىجىلدىعىندا ەۋروپادا 1،24 ميلليوننان استام ەلەكتركولىك ساتىلدى – بۇل وتكەن جىلمەن سالىستىرعاندا 33،7 پايىزعا ارتىق.
الايدا بۇنىمەن قاتار جاقىن ارادا قايتا وڭدەۋدى قاجەت ەتەتىن باتارەيالار سانى دا ارتىپ كەلەدى. حالىقارالىق ەنەرگەتيكالىق اگەنتتىكتىڭ دەرەگىنشە، الداعى ءتورت جىلدا شامامەن 1،2 ميلليون اككۋمۋلياتور قالدىققا اينالۋى مۇمكىن. 2040 جىلعا قاراي ولاردىڭ سانى 14 ميلليونعا جەتۋى ىقتيمال.
ليتي-يوندى باتارەيالاردى قايتا وڭدەۋگە بولادى، ءبىراق بۇل پروسەسس ءالى دە قىمبات جانە تەحنولوگيالىق تۇرعىدان كۇردەلى. ەۋروپادا اككۋمۋلياتورلاردى بولشەكتەۋدى اۆتوماتتاندىرۋعا، قۇندى ماتەريالداردى الۋدى قازىرگى 50 پايىزدان 90-95 پايىزعا دەيىن ارتتىرۋعا جانە باتارەيالاردىڭ ءبىر بولىگىن قايتا پايدالانۋعا – مىسالى، ەنەرگيا جيناقتاۋ جۇيەلەرىندە – مۇمكىندىك بەرەتىن تەحنولوگيالار ازىرلەنۋدە.
«ەلەكتروموبيلدەر كومىرتەگى شىعارىندىلارى از ەكونوميكاعا كوشۋدە ماڭىزدى ءرول اتقارادى، ءبىراق ولاردىڭ ۇزاق مەرزىمدى تابىسى قالدىقتار اعىنىن قانشالىقتى ءتيىمدى باسقاراتىنىمىزعا بايلانىستى»، – دەپ اتاپ ءوتتى Valpak كومپانياسىنىڭ وكىلى دجەيمس سكيفمور.
اككۋمۋلياتورلاردى قايتا وڭدەۋ ماسەلەسى قازاقستان ءۇشىن دە بىرتىندەپ وزەكتى بولا تۇسۋدە. بۇعان دەيىن ەلىمىزدە اۆتوبۋستاردى قوسقاندا شامامەن 21 مىڭ ەلەكتروموبيل تىركەلگەنى حابارلانعان بولاتىن. ازىرگە ولاردىڭ كوپشىلىگى باتارەيالاردىڭ قىزمەت مەرزىمىنىڭ اياقتالۋىنان الىس، ءبىراق پارك وسكەن سايىن اككۋمۋلياتورلاردى ءقاۋىپسىز قايتا وڭدەۋ جانە ولارداعى ماتەريالداردى قايتا پايدالانۋ ماڭىزدىلىعى ارتا تۇسپەك.