21-25 قىركۇيەك ارالىعىندا قازاقستاندا حالىقارالىق اۆياسيالىق قاۋىپسىزدىك باعالاۋى (IASA) وتەدى. ونى اقش فەدەرالدىق اۆياسيا اكىمشىلىگى جۇرگىزەدى. بۇل تۋرالى قازاقستان رەسپۋبليكاسى كولىك مينيسترلىگىنىڭ ءباسپاسوز قىزمەتى حابارلادى، دەپ جازادى infohub.kz سايتى.
ۆەدومستۆونىڭ ناقتىلاۋىنشا، 2026 جىلعى باعالاۋ FAA-مەن جۇرگىزىلىپ جاتقان دايىندىق جۇمىستارىنىڭ جالعاسى. سوڭعى ەكى جىلدا كولىك مينيسترلىگى قازاقستاننىڭ اۆياسيالىق اكىمشىلىگىمەن جانە قازاقستاننىڭ اقش-تاعى ەلشىلىگىمەن بىرلەسىپ، قازاقستان مەن اقش اراسىنداعى تىكەلەي اۋە قاتىناسىن اشۋ باعىتىندا جۇمىس ىستەپ كەلەدى.
«باعالاۋ مەملەكەتتىڭ ۇشۋ قاۋىپسىزدىگىن قاداعالاۋ جۇيەسىنە قاتىستى جۇرگىزىلەدى جانە قازاقستان رەسپۋبليكاسىنىڭ اۆياسيالىق ورگاندارىنىڭ 1-قوسىمشاداعى «اۆياسيالىق پەرسونالعا كۋالىك بەرۋ»، 6-قوسىمشانىڭ I بولىمىندەگى «حالىقارالىق كوممەرسيالىق اۋە كولىگى – ۇشاقتار» جانە 8-قوسىمشاداعى «اۋە كەمەلەرىنىڭ ۇشۋعا جارامدىلىعى» تالاپتارىندا كورسەتىلگەن قولدانىستاعى ستاندارتتار مەن ۇسىنىلعان تاجىريبەگە سايكەستىگىن انىقتاۋعا باعىتتالعان. تەكسەرۋ بارىسىندا FAA ساراپشىلارى اۆياسيالىق زاڭنامانى، زاڭعا تاۋەلدى نورماتيۆتىك قۇقىقتىق اكتىلەردى جانە مەملەكەتتىڭ ۇشۋ قاۋىپسىزدىگىن قامتاماسىز ەتۋدى مەملەكەتتىك باقىلاۋ جۇيەسىنىڭ سەگىز سىني ەلەمەنتىنە سايكەس قاداعالاۋ جۇرگىزۋ قابىلەتىن قاراستىرادى»، — دەلىنگەن حابارلامادا.
سونداي-اق ۆەدومستۆو 24 قىركۇيەكتە FAA كومانداسىنىڭ اقش كولىك مينيسترلىگىنەن كوممەرسيالىق قىزمەتكە رۇقسات الۋعا ءوتىنىم بەرگەن Air Astana اۋەكومپانياسىنا تەحنيكالىق ساپارى جوسپارلانعانىن مالىمدەدى.
«سالاردىڭ ماقساتى — اشىقتىقتى قامتاماسىز ەتۋ پروسەسى اياسىندا قازاقستاننىڭ اۆياسيالىق اكىمشىلىگىندە الىنعان اقپاراتتى راستاۋ. بۇل ساپار اۋەكومپانيانى پايدالانۋشى سەرتيفيكاتىنىڭ يەگەرى رەتىندە تەكسەرۋ بولىپ سانالمايدى. اياقتالعان سوڭ FAA قازاقستاننىڭ اۆياسيالىق اكىمشىلىگىمەن قورىتىندى بريفينگ وتكىزىپ، كەيىن قارالعان باعىتتار بويىنشا جازباشا ەسەپ ۇسىنادى. IASA باعالاۋىن جۇرگىزۋ — ۇشۋ قاۋىپسىزدىگىن مەملەكەتتىك قاداعالاۋ جۇيەسىن ودان ءارى نىعايتۋدىڭ جانە قازاقستان مەن اقش اراسىندا تىكەلەي اۋە قاتىناسىن اشۋ جۇمىسىن ىلگەرىلەتۋدىڭ ماڭىزدى كەزەڭى»، — دەپ ناقتىلادى كولىك مينيسترلىگى.
ەسكە سالايىق، ساۋىردە Air Astana قازاقستان مەن اقش اراسىنداعى تىكەلەي اۋە قاتىناسىن اشۋعا قانداي قيىندىقتار اسەر ەتىپ جاتقانىن ايتقان بولاتىن. مامىردا كولىك ءمينيسترى نۇرلان ساۋرانبايەۆ اقش-قا تىكەلەي رەيستەردى 2027 جىلدىڭ II توقسانىندا ىسكە قوسۋدى جوسپارلاپ وتىرعانىن مالىمدەگەن.