شىلدە ايىنىڭ باسىندا قىرعىزستاننىڭ وش قالاسىنداعى بازارلاردىڭ بىرىندە جۇرتشىلىق نازارىن اۋدارعان وقيعا بولدى. بۇل تۋرالى ult.kz حابارلايدى.
قۇلپىناي ساۋدالاپ جۇرگەن قاراپايىم فەرمەر مەن بىرنەشە ادام اراسىندا جانجال تۋىپ، سوڭى كاسىپكەردىڭ سوققىعا جىعىلۋىمەن اياقتالدى. وقيعانىڭ بەينەجازباسى الەۋمەتتىك جەلىلەردە كەڭ تاراپ، قىزۋ تالقىعا ءتۇستى.
بەينەنى كورگەن مىڭداعان ادام فەرمەرگە قولداۋ ءبىلدىرىپ، ونىڭ ەڭبەگىنە قۇرمەت كورسەتتى. ادىلەتسىزدىككە ۇشىراعان كاسىپكەرگە كومەكتەسكىسى كەلگەندەر ارنايى ونىڭ ساۋدا نۇكتەسىنە بارىپ، ءونىم ساتىپ الا باستادى. ناتيجەسىندە بىرنەشە كۇن ىشىندە بارلىق قۇلپىناي ساتىلىپ ءبىتىپ، ساتىپ الۋشىلار ۇزىن كەزەككە تۇردى.
بىرنەشە اپتادان كەيىن فەرمەردىڭ ءومىرى مۇلدە وزگەردى. بۇرىن تەك جەرگىلىكتى تۇرعىندارعا تانىس بولعان كاسىپكەر بۇگىندە وشتاعى ەڭ سۇرانىسقا يە قۇلپىناي ساتۋشىلاردىڭ بىرىنە اينالدى. ونىڭ كۇندەلىكتى جۇمىسى الەۋمەتتىك جەلىلەردە تىكەلەي ەفيردە كورسەتىلىپ، ۆيدەولارى جۇزدەگەن مىڭ قارالىم جينايدى.
الەۋمەتتىك جەلىلەردە تانىمالدىعى ارتقان سايىن فەرمەرگە ءارتۇرلى كومپانيالار مەن جارناما بەرۋشىلەر قىزىعۋشىلىق تانىتتى. ءقازىر ول بىرنەشە برەندپەن ىنتىماقتاسىپ، جارناما ۇسىنىستارىن قابىلداپ، بيزنەسىن كەڭەيتۋگە مۇمكىندىك الدى.
ونىڭ ايتۋىنشا، كۇتپەگەن قولداۋدىڭ ارقاسىندا ول جاڭا ساۋدا جابدىقتارىن ساتىپ الىپ، ءونىم كولەمىن ۇلعايتقان. سونىمەن قاتار، ول كومەكشىلەر جالداعان. فەرمەردىڭ جوسپارىندا قۇلپىنايدان بولەك باسقا دا باۋ-باقشا داقىلدارىن ساتۋ بار.
الايدا ول تانىمالدىقتى تەك جەكە پايدا ءۇشىن پايدالانبايدى. ءقازىر كاسىپكەر مۇقتاج وتباسىلارعا ۇنەمى ونىمدەرىن ۇلەستىرىپ، از قامتىلعان ازاماتتارعا جەمىس-جيدەكتەردى تەگىن بەرەدى. سونداي-اق ول اۋىلدارداعى بالالارعا ارنالعان قايىرىمدىلىق اكسيالارىنا قاتىسىپ، الەۋمەتتىك جوبالاردى قولدايدى.