قازاقستاندا ءىىم ۆەدومستۆولىق وقۋ ورىندارىنا تالاپكەرلەردى قابىلداۋ تۋرالى جالعان SMS-حابارلامالار تاراتۋ جيىلەپ كەتتى. بۇل تۋرالى ىشكى ىستەر مينيسترلىگى ەسكەرتتى، دەپ حابارلايدى infohub.kz.
Polisia.kz Telegram-ارناسىنىڭ مالىمەتىنشە، بۇل حابارلامالار جالعان جانە مينيسترلىككە قاتىسى جوق. «قازىرگى تاڭدا قابىلداۋ ناۋقانى ءالى جالعاسۋدا. كونكۋرستىق ىرىكتەۋدىڭ بارلىق كەزەڭدەرى اياقتالعان جوق. قابىلداۋ بەلگىلەنگەن مەرزىمدە — 15-25 شىلدە ارالىعىندا جۇرگىزىلۋدە»، — دەپ ءتۇسىندىردى ۆەدومستۆودا.
قابىلداۋ ناۋقانىنىڭ قورىتىندى ناتيجەلەرى ىرىكتەۋدىڭ بارلىق كەزەڭدەرى اياقتالىپ، قابىلداۋ كوميسسيالارى شەشىم قابىلداعاننان كەيىن عانا تالاپكەردىڭ Qyzmet police اقپاراتتىق جۇيەسىندەگى جەكە كابينەتىندە قولجەتىمدى بولادى. ءىىم اقپاراتتىق جۇيە تالاپكەرلەردى قابىلداۋ تۋرالى SMS-حابارلامالار جىبەرمەيتىنىن اتاپ ءوتتى.
ازاماتتاردان مۇنداي حابارلامالارعا سەنبەۋ، ولارداعى سىلتەمەلەرگە وتپەۋ، جەكە دەرەكتەرىن حابارلاماۋ جانە تەك ءىىم-نىڭ رەسمي اقپاراتىن پايدالانۋ سۇرالادى.