الەمدىك فۋتبولدا ۇلكەن جانجال تۋىنداپ جاتىر. فيفا باسشىلىعى الەم چەمپيوناتىنا قۇقىقتاردى جەكە ينۆەستورلارعا ساتۋدى جوسپارلاعانى بەلگىلى بولدى، دەپ حابارلايدى infohub.kz سايتى.
سپورت باسىلىمىنىڭ دەرەگىنشە، دجانني ينفانتينو الەم چەمپيوناتتارىن ۇيىمداستىرۋ ءۇشىن جەكە كومپانيا قۇرىپ، ونىڭ اكسيالارىن دونالد ترامپتىڭ جاقىن ادامدارىنىڭ قولداۋىمەن ساتۋدى ويلاستىرىپ جاتىر.
The Times گازەتىنىڭ جازۋىنشا، فيفا جوسپارى – نەگىزگى اكتيۆتەردى باسقارۋ ءۇشىن كومپانيا قۇرۋ: ەرلەر اراسىنداعى الەم چەمپيوناتى، ايەلدەر اراسىنداعى الەم چەمپيوناتى جانە كلۋبتىق الەم چەمپيوناتى. جوبا بويىنشا دونالد ترامپ اكىمشىلىگىنە جاقىن ادامدارمەن كەڭەسكەندەرى ايتىلادى.
بۇل اقپاراتتى فيفا رەسمي تۇردە راستادى.
"ينۆەستيسيالىق توپتى Thrive Capital كومپانياسى باسقارادى دەپ كۇتىلۋدە. ونى دونالد ترامپتىڭ كۇيەۋ بالاسى، قازىرگى ۋاقىتتا اقش تاراپىنان بەيبىت كەلىسسوزشى رەتىندە تانىمال دجارەد كۋشنەردىڭ ءىنىسى دجوشۋا كۋشنەر قۇرعان"، — دەلىنگەن جاريالانىمدا.
جوسپار بويىنشا 211 ۇلتتىق قاۋىمداستىق پەن فيفا مۇشەلەرىنىڭ ءارقايسىسى شامامەن 20 ملن دوللار تۇراتىن ۇلەس الادى. قاۋىمداستىقتار بۇل ۇلەستى نە ساقتاپ قالۋى، نە قوسىمشا تابىس الۋ ءۇشىن دەرەۋ ساتا الادى.
The Times دەرەككوزدەرىنىڭ ايتۋىنشا، سوڭعى پرەزيدەنتتىك مەرزىمىنەن كەيىن ينفانتينونى جاڭا كومپانيانىڭ كوميسسارى ەتىپ تاعايىنداۋ جوسپارلانۋدا. ونى 2031 جىلعا دەيىن بالاماسىز فيفا پرەزيدەنتى ەتىپ قايتا سايلاۋى ابدەن مۇمكىن، ال ودان كەيىن ءتۇرلى نۇسقالار – جاڭا جۇمىس قاراستىرىلۋدا.
الايدا ۋەفا الەم چەمپيوناتىن بولىكتەپ ساتۋعا قارسى شىقتى.
"بۇل — فۋتبولدىڭ باسقارۋ ورگاندارى ەشقاشان اتتاماۋعا ءتيىس شەك. ۋەفا مۇنى بارىنشا بايىپپەن قابىلدايدى. بارلىق ۇلتتىق فۋتبول قاۋىمداستىقتارى دا سولاي ىستەۋى كەرەك. بارلىق مۇددەلى تاراپتار: ليگالار، كلۋبتار، ويىنشىلار، جانكۇيەرلەر، ۇكىمەتتەر جانە فۋتبولدىڭ بولاشاعى بەيجاي قارامايتىن ءاربىر ادام وسىلاي قاراۋى ءتيىس. فۋتبولدىڭ جانى مەن باسقارۋ جۇيەسى – ول ساۋدا جاساۋعا بولاتىن اكتيۆ ەمەس، اسىرەسە قارجىلىق پايدانى كىم الاتىنى تۋرالى تولىق اشىقتىق بولماعان جاعدايدا. ەشقايسىمىز فۋتبولدىڭ يەسى ەمەسپىز. ال فيفا ونى ساتۋعا قۇقىلى ەمەس"، — دەپ جاۋاپ بەردى ۋەفا.
بريتان ساياساتكەرى ەندي بەرنەم دە بىردەن ءۇن قاتتى.
"فۋتبول ينۆەستورلارعا تيەسىلى ەمەس. ول اپتا سايىن، كەز كەلگەن اۋا رايىندا، جاڭبىردا نەمەسە كۇن استىندا، الاڭ شەتىندە ءوز كوماندالارىن قولداپ تۇراتىن تريبۋنالاردى تولتىراتىن ادامدارعا تيەسىلى. الەم چەمپيوناتى – تاۋار ەمەس. بۇل — الەمدىك سپورتتاعى ەڭ ۇلى جارىس جانە ول ەشقاشان ساتۋعا بولاتىنداي ەشكىمگە تيەسىلى بولماعان. بۇل مامىلەنى قالاي اتاساڭىز دا اتاڭىز، ءبىراق ءبىر بولىگىن ساتساڭىز، ءسىز بارىنە وپاسىزدىق جاسايسىز. فۋتبول جانكۇيەرلەرگە تيەسىلى. ول ءارقاشان سولاي بولدى جانە سولاي بولماق"، — دەدى ول.