حالىقارالىق فۋتبول فەدەراسياسى (فيفا) يسپانيا قۇراماسىنىڭ الەم چەمپيوناتىنداعى جەڭىسىن تويلاۋ سۋرەتتەرىنەن اقش پرەزيدەنتى دونالد ترامپتى الىپ تاستادى، دەپ حابارلايدى infohub.kz سايتى.
فيفا يسپانيانىڭ ارگەنتينانى جەڭۋىنە وراي الەۋمەتتىك جەلى X-تە جاريالانعان سۋرەتتەردەن پرەزيدەنت دونالد ترامپ پەن فيفا پرەزيدەنتى دجانني ينفانتينونى الىپ تاستادى. ترامپ جەڭىمپاز كومانداعا كۋبوك تابىس ەتىلگەننەن كەيىن ساحنادا كىدىرىپ قالعان ەدى.
ترامپ ينفانتينومەن بىرگە الەم كۋبوگىن يسپانيا قۇراماسىنىڭ كاپيتانى رودريگە تاپسىرعان كەزدە، ول تۇعىردان كەتۋدى ويلامادى. يسپانيالىقتار كۋبوكتى باستارىنان جوعارى كوتەرگەنشە، ترامپ كادردا قالا بەردى. امەريكاندىق كوشباسشى تەك ينفانتينو جانىنا كەلىپ، ەكەۋى بىرگە چەمپيوندىق تۇعىردى تاستاپ كەتكەن سوڭ عانا كەتتى.
فيفا پاراقشاسىندا تىك فورماتتاعى سۋرەت جاريالاندى، وندا اقش پرەزيدەنتى «كەسىلىپ» قالعان.
ەستەرىڭىزگە سالا كەتەيىك، 2026 جىلعى الەم چەمپيوناتىنىڭ فينالى امەريكانىڭ يست-راتەرفورد قالاسىندا ءوتىپ، يسپاندىقتار ارگەنتينالىقتاردى 1:0 ەسەبىمەن جەڭدى. شەشۋشى گولدى قوسىمشا ۋاقىتتىڭ 106-مينۋتىندا فەرران توررەس سوقتى.
يسپانيا قۇراماسىنىڭ فۋتبولشىلارى 2026 جىلعى الەم چەمپيوناتىنداعى جەڭىسى ءۇشىن كۋبوكپەن ماراپاتتالدى. سالتاناتتى راسىمگە دونالد ترامپ قاتىستى.
بۇعان دەيىن ترامپ پەن ينفانتينونى فينال كەزىندە جانكۇيەرلەر ىسقىرىقپەن قارسى العانى، ال ارگەنتينا قۇراماسىنىڭ قورعاۋشىسى كريستيان رومەرو ماراپاتتاۋ راسىمىندە اقش پرەزيدەنتىمەن قول الىسپاعانى حابارلانعان بولاتىن.