فيل كوللينز پول ماككارتنيمەن 24 جىلعا سوزىلعان رەنىشىنىڭ كۇتپەگەن جەردەن اياقتالعانىن ايتتى، دەپ حابارلايدى infohub.kz سايتى. مۋزىكانتتار 2002 جىلى The Beatles توبىنىڭ بۇرىنعى مۇشەسىنىڭ قىسقا عانا سوزىنەن كەيىن رەنجىسىپ قالعان ەدى.
ەليزاۆەتا IIء-نىڭ التىن مەرەيتويىنا ارنالعان كونسەرتتىڭ دايىندىعى كەزىندە كوللينز ماككارتنيگە حانتەر دەۆيستىڭ The Beatles تۋرالى كىتابىنىڭ سيرەك كەزدەسەتىن العاشقى باسىلىمىن كورسەتىپ، قولتاڭبا سۇراعان. كوللينزدىڭ ايتۋىنشا، ماككارتني سوندا ايەلى حيزەر ميللسكە: «ول The Beatlesء-تىڭ ۇلكەن جانكۇيەرى، ءبىزدىڭ كىشكەنتاي فيل، سولاي ەمەس پە؟» — دەگەن.
كوللينز «كىشكەنتاي» دەگەن ءسوزدى اۋىر قابىلداعانىن جاسىرمايدى. «مەن: «سەن اقىماقسىڭ» دەپ ويلادىم. ءوزىمدى ۇستاي المادىم»، — دەپ اڭگىمەلەدى مۋزىكانت بريتاندىق جۋرناليست پيرس مورگانعا. كەيىن كوللينز ماككارتنيدىڭ سوزىنە ول قاجەت بولماعانشا كوپ ءمان بەرگەن بولۋىم مۇمكىن دەپ مويىنداعان.
تاتۋلاسۋعا كوللينزدىڭ قايىرىمدىلىق قىزمەتى سەبەپ بولدى. ول King’s Trust قايىرىمدىلىق قورىنىڭ پايداسىنا اۋكسيونعا مۋزىكالىق ەستەلىك زاتتار جيناعان، مۇنى ماككارتني ءبىلىپ قالعان. كوللينزدىڭ ايتۋىنشا، ماككارتني وعان قوڭىراۋ شالىپ، ارالارىنداعى كوپ جىلدىق سۋىقتىقتىڭ جالپى سەبەبى نەدە ەكەنىن سۇراعان.
«مەن: «مۇنى ايتقانىم وكىنىشتى، پول. ايتقانىما وكىنەمىن»، — دەدىم». ماككارتني، كوللينزدىڭ ەسىندە قالعانىنداي: «مەن ءبىزدىڭ ارامىزدا ءبارى جاقسى دەپ ويلاپپىن»، — دەپ جاۋاپ بەرگەن. «ءسويتىپ تاتۋلاستىق»، — دەدى مۋزىكانت.
كوللينز تاتۋلاسقانىنا جانە ەسكى اڭگىمەنى اقىرى تالقىلاعاندارىنا قۋانىشتى ەكەنىن قوستى. «ول — ءومىرىمنىڭ ءبىر بولىگى»، — دەدى مۋزىكانت.
بۇعان دەيىن Kursiv LifeStyle The Beatles تۋرالى بايوپيك جاساۋشىلاردىڭ اتى اڭىزعا اينالعان Abbey Road مۇقاباسىن قايتالاعانىن جازعان بولاتىن.