ءفيليپپيننىڭ وڭتۇستىگىندەگى ورتا مەكتەپتە بولعان اتىستان كەمىندە ءبىر ادام قازا تاۋىپ، بىرنەشە ادام جاراقات الدى. وقيعا جۇما كۇنى تۇستەن كەيىن ميناداناو ارالىنداعى وڭتۇستىك كوتاباتو پروۆينسياسىنداعى بانگا ۇلتتىق ورتا مەكتەبىندە بولدى، دەپ حابارلايدى infohub.kz سايتى.
اتىسقان ادامنىڭ جانە قۇربانداردىڭ كىم ەكەنى ازىرگە انىقتالعان جوق. جەرگىلىكتى بۇقارالىق اقپارات قۇرالدارى مەن رەسمي تۇلعالار قازا تاپقاندار مەن جاراقات العاندار سانى تۋرالى ءارتۇرلى دەرەكتەر كەلتىرىپ وتىر.
فيليپپين ءبىلىم مينيسترلىگى تاراتقان مالىمدەمەدە وقيعاعا «قاتتى الاڭداۋشىلىق» بىلدىرىلگەن. «ءبىزدىڭ ءبىرىنشى كەزەكتەگى مىندەتىمىز — وقۋشىلاردىڭ، مۇعالىمدەردىڭ جانە مەكتەپ قىزمەتكەرلەرىنىڭ قاۋىپسىزدىگى مەن ءال-اۋقاتى»، — دەلىنگەن مالىمدەمەدە. ۆەدومستۆو قۇزىرلى ورگاندارمەن بىرلەسىپ وقيعانى تەكسەرىپ، قاجەتتى قولداۋ كورسەتۋگە كىرىسكەنىن جەتكىزدى.
«بارشاڭىزدى سابىر ساقتاۋعا جانە تەكسەرىلمەگەن اقپاراتتى تاراتپاۋعا شاقىرامىز، ويتكەنى قۇزىرلى ورگاندار تەرگەۋدى جالعاستىرىپ جاتىر»، — دەپ اتاپ ءوتتى مينيسترلىك.
وڭتۇستىك كوتاباتو گۋبەرناتورى رەينالدو تامايو بۇعان دەيىن جۋرناليستەرگە ءبىر ادامنىڭ قازا تاپقانىن، ءتورت ادامنىڭ اۋرۋحاناعا جات قىزىلعانىن ايتقان. ول اتىسقان ادامنىڭ كىم ەكەنىن ناقتىلامادى جانە ونىڭ قازا تاپقاندار نە جاراقات العاندار قاتارىندا ەكەنىن دە كورسەتپەدى.
جەرگىلىكتى بۇقارالىق اقپارات قۇرالدارى ءفيليپپيننىڭ باسقا دا رەسمي ورگاندارىنا سىلتەمە جاساپ، قازا تاپقاندار مەن جاراقات العاندار سانى الدەقايدا كوپ دەپ حابارلاپ وتىر.
بانگا قالاسىنىڭ توتەنشە جاعدايلار باسقارماسى تاراتقان مالىمدەمەگە سايكەس، اتىسقا بايلانىستى «بانگا مۋنيسيپاليتەتىنىڭ بارلىق دەڭگەيدەگى وقۋ ورىندارىندا» ساباق توقتاتىلدى.
فيليپپين قىزىل كرەست ۇيىمى اتىستان كەيىن كومەك كورسەتۋ ءۇشىن مەديسينالىق توپتاردى جىبەرگەنىن مالىمدەدى.
جەرگىلىكتى بۇقارالىق اقپارات قۇرالدارىنىڭ حابارلاۋىنشا، پوليسيا قىزمەتكەرلەرى وقيعا ورنىندا تەرگەۋ جۇرگىزىپ جاتىر.
فيليپپيندە اتىس قارۋىمەن جاسالاتىن قىلمىستار سيرەك ەمەس — بۇل ەل ايماقتاعى قارۋ يەلەنۋ دەڭگەيى ەڭ جوعارى مەملەكەتتەردىڭ ءبىرى سانالادى، الايدا مەكتەپتەردەگى اتىس وقيعالارى ونشا ءجيى كەزدەسپەيدى.
ماۋسىم ايىندا ءفيليپپيننىڭ ورتالىعىنداعى ورتا مەكتەپتە قۇرداستارى وق جاۋدىرعاننان كەيىن ءۇش وقۋشى قازا تاۋىپ، تاعى بىرنەشە ادام جاراقات العان بولاتىن. تەرگەۋشىلەر بۇل قاندى وقيعانى «بوپسالاۋعا بايلانىستى كەك» سەبەبىنەن بولدى دەپ بولجاعان.